ԵՐԵՎԱՆ, 22 փետրվարի - Sputnik. Մարդու իրավունքների պաշտպանը հրապարակել է արտահերթ զեկույց զինծառայողներին և նրանց ընտանիքներին արտոնություններ տրամադրելու վերաբերյալ: Տեղեկությունը հայտնում է ՄԻՊ գրասենյակը։
ՀՀ ՄԻՊ Արման Թաթոյանի կողմից առաջարկվող արտոնություններից են, օրինակ․
- աշխատանքի պահպանման նախապատվության իրավունքը,
- չվճարվող արձակուրդի տրամադրման պարտադիր կարգը,
- ամենամյա արձակուրդի ժամանակի ընտրության արտոնությունը,
- զբաղվածության պետական ծրագրերում ընդգրկվելու առաջնահերթության իրավունքը և այլն։
«Զինված ուժերի և այլ զորքերի զինծառայողների, ինչպես նաև նրանց ընտանիքների անդամների համար Մարդու իրավունքների պաշտպանի աշխատակազմի մշակած արտոնությունների ընդունումը կունենա սոցիալական կարևոր նշանակություն և կնպաստի զինվորական ծառայության հեղինակության աճին։ Առաջարկվող արտոնությունները նաև կբարձրացնեն ծառայություն անցնող կամ անցած զինծառայողների կարգավիճակը»,–նշված է հաղորդագրության մեջ:
Ըստ ՄԻՊ զեկույցի`ներկայացվող առաջարկությունների իրական շահառուներ կարող են լինել տարբեր կատեգորիայի զինծառայողներ կամ նրանց ընտանիքների անդամներ, այդ թվում՝
ա) ժամկետային պարտադիր և պայմանագրային զինվորական ծառայություն անցած կամ անցնող շարքային, ենթասպայական, սպայական կազմի զինծառայողները և նրանց ընտանիքների անդամները,
բ) ՀՀ պաշտպանության մարտական գործողությունների մասնակիցներ,
գ) ՀՀ պաշտպանության ժամանակ հաշմանդամություն ձեռք բերած զինծառայողներ, նրանց և զոհված (մահացած) զինծառայողների ընտանիքների անդամներ,
դ) ՀՀ կամ պաշտպանության ոլորտում պետական լիազոր մարմնի հետ ռազմական փոխօգնության պայմանագրերի հիման վրա այլ երկրների պաշտպանության մարտական գործողություններին մասնակցած կամ մասնակցող անձինք կամ նրանց ընտանիքների անդամներ և այլն:
«Պետք է ամեն կերպ արժևորել զինվորական ծառայությունը, իսկ առաջարկվող արտոնությունները կնպաստեն, որպեսզի բանակում ծառայությունը դառնա ավելի գրավիչ նաև հենց ծառայության մեջ գտնվողների և նրանց ընտանիքների համար»,–շեշտել է Թաթոյանը:
Հավելենք, որ զեկույցը մշակվել է՝ հաշվի առնելով համապատասխան միջազգային փորձը։
Կրակոցներ արձակած ադրբեջանցիները գտնվում են 1 կիլոմետրից պակաս տարածության վրա. ՄԻՊ
