ԵՐԵՎԱՆ, 9 ապրիլի - Sputnik. Արցախյան պատերազմում անհետ կորածների և գերեվարվածների հարազատները ՀՀ պաշտպանության նախարարության մոտ բողոքի ակցիա են իրականացնում: Նրանք հանդիպում են պահանջում են ՀՀ ՊՆ նախարար Վաղարշակ Հարությունյանի և Գլխավոր շտաբի պետ Արտակ Դավթյանի հետ:
Նախարարության բոլոր 4 մուտքերն այս պահին փակ են։ Զինծառայողների հարազատները փորձում են բացել դարպասներից: Նրանց հաջողվել է պոկել դարպասների մի մասը: Ծնողների ձեռքին կան բենզինով շշեր, նրանք սպառնում են պայթեցնել ՊՆ–ի շենքի մոտ կայանած մեքենաները եթե պաշտոնյաները հանդիպման չգան։
«Թող գան՝ մեզ պատասխան տան, այլ ոչ թե կառավարեն»,–բղավում են ծնողները։
Ոստիկանությունը մեծ ուժեր է կենտրոնացրել այստեղ: Նրանք պատ են կազմել և թույլ չեն տալիս, որ մյուս ծնողները ևս մոտենան դարպասներին:
Այստեղ է ԱԺ պատգմավոր Սոֆյա Հովսեփյանը, նա հեռախոսով խոսել է պաշտպանության փոխնախարար Արման Սարգսյանի հետ ու հայտնել հավաքվածներին, որ այս պահին ժողով է ՊՆ-ում. հարցին լուծում տալու համար փորձում են օպտիմալ տարբերակ գտնել:
Դեպքի վայր է ժամանել նաև ոստիկանության պետ Վահե Ղազարյանը:
Իհարկե չգիտեինք, որ այդպես է լինելու․ Անդրանիկ Քոչարյանը՝ առանց գերիների ինքնաթիռի մասին
Հիշեցնենք, որ երեկ`ապրիլի 8–ին, ժամը 11–ից անհայտ կորած զինծառայողների ծնողները փակել են ՊՆ–ի բոլոր մուտքերը և թույլ չեն տալիս, որպեսզի ներսում գտնվող աշխատակիցները դուրս գան։ Իսկ երեկ երեկոյան ռազմագերիների հարազատները ՊՆ–ի մոտ եկան այն բանից հետո, երբ նախապես հայտարարված ռազմագերիների վերադարձը հետաձգվեց։
Հավելենք, որ երեկ պաշտոնական լուրեր տարածվեցին, որ գերիների նոր խումբ է վերադառնում Հայաստան։ Ադրբեջանում պահվող անձանց ծնողներն ու հարազատները հավաքվեցին «Էրեբունի» օդանավակայանում, սակայն ավելի ուշ փոխվարչապետ Ավինյանի գրասենյակը հայտարարեց, որ գերիների վերադարձ չի հաջողվել կազմակերպել։
