ԵՐԵՎԱՆ, 3 մայիսի - Sputnik. ՀՅԴ անդամ Գեղամ Մանուկյանի որդուն` Տարոն Մանուկյանին դարձյալ հրավիրել են Քննչական կոմիտե։ Այս մասին նա հայտնել է Facebook-ի իր էջում` հրապարակելով ծանուցման լուսանկարը։
«Մեր դուռը կրկին ծեծեցին։ Այս անգամ ծանուցագիրը հորս չէր հասցեագրված, այլ ինձ։ Մի քանի անգամ առիթ ունեցել եմ նշելու, հիմա էլ միտքս կրկնում եմ. մեզ քրեական հետապնդումներով ավելի եք մոտիվացնում, այ անՀայրենիք տականքներ։ Պայքարը շարունակվում է։ Ամոթ հետ նահանջողին»,– գրում է Տարոն Մանուկյանը։
Ծանուցագրից հայտնի է դառնում, որ երիտասարդին հրավիրել են ՔԿ Երևանի քննչական վարչության ծանր հանցագործությունների քննության բաժին, այսօր` մայիսի 3-ին, ժամը 15։00-ին, խուլիգանության և իշխանության ներկայացուցչի նկատմամբ բռնություն գործադրելու փաստով հարուցված քրեական գործի շրջանակներում`որպես մեղադրյալ ներգրավվելու ու հարցաքննվելու նպատակով։
Քրեական գործի նախաքննությունն իրականացնում է ՔԿ ՀԿԳ քննիչ Նարեկ Մարտիրոսյանը։
Քաջարանի քաղաքապետը հրավիրվել է Քննչական կոմիտե. նրան նոր մեղադրանք է առաջադրվել
Նշենք, որ ավելի վաղ ՀՅԴ ներկայացուցիչներին` Գեղամ Մանուկյանին, Արծվիկ Մինասյանին ու այլոց արդեն հրավիրել էին ՔԿ։ Անցած հինգշաբթի Գեղամ Մանուկյանը ՔԿ–ից դուրս գալուց հետո լրագրողներին հայտնել էր, որ իրեն հրավիրել էին որպես կասկածյալ, բայց արդեն ՔԿ–ում հայտնել են, որ ինքը վկայի կարգավիճակ ունի։
