ԵՐԵՎԱՆ, 17 մայիսի - Sputnik. Սննդամթերքի անվտանգության տեսչական մարմինը տեղեկացնում է, որ կասեցվել է կաթնամթերք արտադրող երկու արտադրամասի գործունեությունը։
«Տեսչական մարմնի Արարատի մարզային կենտրոնի տեսուչները վերահսկողական միջոցառումներ են անցկացրել անհատ ձեռնարկատեր Նորայր Արսենյանի կաթնամթերքի՝ պանրի, արտադրամասում (գ. Այնթապ) ու ԽԱՔ ՍՊԸ-ում (կաթնամթերքի արտադրամաս, գ. Քաղցրաշեն)։ Պարզվել է, որ տեխնոլոգիական գործընթացը կազմակերպված չէ իրավական նորմերով ամրագրված պահանջներին համապատասխան»,–նշված է հաղորդագրության մեջ։
«Մշակել ենք նոր տնտեսական քաղաքականություն». Քերոբյանը մանրամասներ է հայտնել
Բացի այդ, պարզվել է նաև, որ խախտվել են սանիտարահիգիենիկ նորմերը, սննդի շղթայում ներգրավված անձնակազմը չի ենթարկվել պարտադիր պարբերական բժշկական զննության։ ԽԱՔ ՍՊԸ-ում 500 գրամանոց, 3,2% յուղայնությամբ մածնի մակնշումը չի համապատասխանել օրենսդրական ակտերով սահմանված մակնշման պահանջներին, սննդամթերք տեղափոխող փոխադրամիջոցն էլ չի ունեցել սանիտարական անձնագիր:
Երկու արտադրամասերին տրվել է ժամկետ խախտումները վերացնելու համար:
