ԵՐԵՎԱՆ, 20 հունիսի – Sputnik. Պրոդյուսեր Արմեն Գրիգորյանին ոստիկանությունը բերման է ենթարկել։ Sputnik Արմենիային ոստիկանության լրատվական ծառայությունից հայտնեցին, որ Գրիգորյանը բերման է ենթարկվել ընտրողներին դաշինքներից մեկի օգտին քվեարկելուն ուղղորդելու կասկածանքով։
Գրիգորյանն ինքն էլ տվյալ դաշինքի դիտորդն է տվյալ ընտրատեղամասում։ Իսկ թե որ դաշինքի դիտորդն է նա` դեռ հայտնի չէ։
Նշենք, որ սոցցանցերում նաև տեսանյութ է հայտնվել, որտեղ նշվում է, որ «Ազատական» կուսակցության ներկայացուցիչն է դիմում գրել Գրիգորյանի դեմ։
Ոստիկանները հայտնում են, որ բաժին գնալուց հետո Գրիգորյանին կասեն բերման ենթարկելու հիմքերը։
Նշենք, որ այսօր առավոտյանը ժամը 08։00–ին Հայաստանում տրվեց ԱԺ արտահերթ ընտրությունների մեկնարկը 2008 ընտրատեղամասում։ Տեղամասերից 479–ը տեղակայված են մայրաքաղաք Երևանում, 1 529–ը` մարզերում։
Ընտրողների ցուցակներում այս պահին ընդգրկված է 2 մլն 593 հազար 572 ընտրող: Բոլոր քաղաքական ուժերի ընտրական ցուցակներում միասին վերցրած ընդգրկված է 2510 թեկնածու: Ընտրություններին կհետևեն 8 միջազգային և օտարերկրյա դիտորդական առաքելություն իրականացնող կազմակերպություններ՝ թվով 833 միջազգային դիտորդներ։
Արտահերթ ընտրություններին մասնակցում է 25 քաղաքական ուժ, որից 4-ը դաշինք են, 21-ը` կուսակցություն։
Ուր զանգել ընտրությունների ժամանակ խնդիր տեսնելիս․ ՄԻՊ-ը հեռախոսահամարներ է տրամադրել