ԵՐԵՎԱՆ, 29 հուլիսի – Sputnik. Կառավարությունը փոփոխություն կատարեց բարձրագույն և հետբուհական, նախնական և միջին մասնագիտական կրթության մասին օրենքներում։
Մասնավորապես, ԿԳՄՍ նախարարի պաշտոնակատար Վահրամ Դումանյանը հայտնեց, որ փոփոխությամբ պետական ուսումնական հաստատություններում կսահմանվեն սովորողների առանձին խմբեր, որոնք կարող են լրիվ կամ մասնակցի օգտվել պետության կողմից տրամադրվող նպաստից։
«Այս փոփոխմամբ սովորողների առանձին խմբերը՝ մարտական գործողությունների մասնակից, կամ 2 և ավելի անչափահաս երեխաներ ունեցող ուսանողները, նպաստ կստանան։ Բացի այդ, սահմանված է առաջադիմության որոշակի սանդղակ, որի դեպքում ուսանողը կստանա պետական աջակցություն։ Առաջադիմության շեմի քննարկվող տարբերակներից է` ՄԿՈւ համակարգում 60 տոկոս, բակալավրիատում` 70, իսկ մագիստրատուրայում` 80 տոկոս ՄՕԳ»,–ասաց Դումանյանը։
Կառավարությունը շարունակում է փոխհատուցել պատերազմի մասնակիցների ուսման վարձերը
Նրա խոսքով` այս տարի ծրագրից կօգտվի շուրջ 4000 ուսանող, իսկ 2022-ին` 6800 ուսանող։
Էկոնոմնիկայի նախարարի պաշտոնակատար Վահան Քերոբյանն էլ հավելեց, որ հիմա տնտեսության վերլուծություն են իրականացնում, որպեսզի կրթական համակարգում պատվերներ տան, այսինքն` համակարգը կատարի տնտեսության պատվերը։
Վարչապետի պաշտոնակատար Նիկոլ Փաշինայնն իր հերթին նշեց, որ լավ մասնագետների լուրջ խնդիր կա, ինչի արմատները հասնում են կրթական համակարգին։ Ուստի, պետք է կրթության ոլորտը տնտեսության հետ համագործակցի։
