ԵՐԵՎԱՆ, 8 օգոստոսի — Sputnik. Ինչպեսև օլիմպիական խաղերում, Ռուսաստանի ներկայացուցիչները խնդիրներ ունեն և այս պահի դրությամբ Ռուսաստանի պարալիմպիական հավաքականը ամբողջ կազմով որակազրկված է դոպինգային սկանդալի պատճառով:
Հայաստանը պարալիմպիական խաղերում ներկայացնելու է երկու մարզիկ. ծանրորդ Գրետա Վարդանյանը եւ լողորդ Մարգարիտա Հովակիմյանը:
Ծանրորդ Գրետա Վարդանյան հաղթանակի հասնելու մեծ ցանկությամբ է մեկնելու Ռիո:
Ռուս մարզիկների որակազրկման հետ կապված հայ մարզուհին նշեց. «Իհարկե, այն մարզիկները, որոնք խախտել են սպորտային կանոնակարգը, պետք է պատժվեն: Բայց ես անարդար եմ համարում, որ որոշ կարգազանցների պատճառով որակազրկվում են մաքուր սպորտսմենները: Պարալիմպիկ խաղերը չորս տարին մեկ են անցկացվում ու նախապատրաստվելու համար մարդիկ, կարելի է ասել, կյանքը չեն խնայում և պատժվում են ուրիշների պատճառով»:
Ռուս պարալիմպիականների բացակայության պայմաններում շատ մարզաձևերում մրցակցությունը, անկասկած, կգցի որակը:
Այդ կարծիքի է հայ մարզուհին. «Դե իհարկե, շատ մարզաձևերում ռուսները տոն են տալիս ու հավակնում բարձր պարգևների: Նրանց բացակայության դեպքում արդեն լարվածությունն էլ մրցահարթակներում կնվազի»:
Կոնկրետ՝ ծանրամարտում, որտեղ հանդես է գալու Գրետա Վարդանյանը, մեր մարզուհու հիմնական մրցակիցներից մեկը Ռուսաստանի ներկայացուցիչն է։
Հայ ծանրորդը համարում է, որ նրա բացակայության դեպքում ավելի հեշտ կլինի հասնել արդյունքի. «Նորից եմ կրկնում՝ անարդար է, որ բոլորին զրկել են, իսկ իմ քաշային կարգում հիմա, անկասկած, ես ավելի լավ շանսեր եմ ստանում մեդալ վաստակելու համար: Կանեմ հնարավորինը՝ այդ արդյունքին հասնելու համար»:
