ԵՐԵՎԱՆ, 14 նոյեմբերի — Sputnik. Նոյեմբերի 19-ին մեկնարկում է Քաղաքապետի գավաթի III խաղարկությունը, հայտնում են Հայաստանի շախմատի ֆեդերացիայից:
Քաղաքապետի գավաթի խաղարկությունն անցկացվելու է երկու փուլով։ Առաջին փուլում տեղի կունենա վեց ընտրական մրցաշար, որոնք կանցկացվեն նոյեմբերի 19-ին, 27-ին, դեկտեմբերի 4-ին, 11-ին, 18-ին, 24-ին: Ընտրական մրցաշարերը կանցկացվեն շվեյցարական մրցակարգով` 9 խաղափուլով: Այս մրցաշարերին կարող են մասնակցել բոլոր ցանկացողները:
Երկրորդ փուլին մասնակցելու իրավունք ունեն առաջին փուլի 10 հաղթողները, 2017թ.-ի հունվարի 1-ի դրությամբ FIDE-ի դասական շախմատի վարկանիշային ցուցակում Հայաստանի շախմատային ֆեդերացիան ներկայացնող առաջին 10 շախմատիստները, ինչպես նաև 4 շախմատիստներ Երևանի շախմատի ֆեդերացիայի հրավերով: Վարկանիշով երկրորդ փուլին մասնակցելու իրավունք ունեցող շախմատիստները ցանկության դեպքում կարող են մասնակցել նաև առաջին փուլի մրցաշարերին` ընդհանուր հաշվարկից դուրս:
Այս 24 շախմատիստները սկզբում կպայքարեն 6-ական մասնակիցներով 4 ենթախմբերում: Ենթախմբերի 2-ական հաղթողները հաջորդ օրը կշարունակեն պայքարը Քաղաքապետի գավաթի համար արդեն նոկաուտ մրցակարգով: Այս փուլը կանցկացվի 2017թ-ի հունվարին` Հայաստանի տղամարդկանց 77-րդ առաջնության ավարտից հետո:
Ենթախմբերի կազմավորման համար մասնակիցները կդասավորվեն ըստ 2017թ.-ի հունվարի 1-ի դրությամբ FIDE-ի դասական շախմատի վարկանիշային ցուցակի: Ենթախմբերում խաղացողների մեկնարկային համարները կորոշվեն վիճականանությամբ:
Մրցաշարի կազմակերպիչն է Երևանի շախմատի ֆեդերացիան:
