ԵՐԵՎԱՆ, 30 դեկտեմբերի – Sputnik, Խաչիկ Չախոյան. Օլիմպիական տարին մի քանի օրից պատմություն կդառնա: Իսկ մեր ըմբիշներն արդեն նախապատրաստվում են օլիմպիական հաջորդ խաղերին:
Հունահռոմեական ըմբշամարտի հավաքականի գլխավոր մարզիչ Լևոն Ջուլֆալակյանը 2016 թվականը իրավմամբ հաջողված է համարում: Տարին սկսելով Եվրոպայի առաջնությունից` հունահռոմեական հայ ըմբիշները չորս մեդալ նվաճեցին, ինչը, անկասկած, մեծ հաջողություն էր:
Հետագայում միջազգային տարբեր կարգի մրցումներով մերոնք շարունակում էին ուրախացնել հայ երկրպագուներին իրենց հաղթանակներով: Օլիմպիական խաղերի նախապատրաստությունը ընթանում էր ամբողջ թափով, սակայն Ջուլֆալականը նշում է, որ կարող էինք ավելիին հասնել:
Այժմ հունահռոմեականների կազմում սահուն սերնդափոխություն է տեղի ունենում: Ազգային հավաքականի թեկնածուների ցանկը լրացրել են երիտասարդ ըմբիշներ: Սակայն միևնույնն է, հաշվի առնելով Հայաստանի վերջին առաջնության մասնակիցների թիվը`65, պարզ է, որ այս մարզաձևում էլ խնդիրներ կան, և քանակի մեջ որակ ունենալն արդեն բացառվում է:
«Իհարկե, անհանգստացնող է մասնակիցների թիվը: Վարպետությունը զարգանում է մրցակցության մեջ, իսկ մրցակցությունը անկում է ապրում: Մենք շատ ըմբիշներ ենք կորցնում բանակային տարիքում: Շատ լավ հասկանում եմ, որ մենք պետք է հայրենիքի պաշտպաններ ունենանք: Բայց կարծում եմ ժամանակն է ստեղծել բանակի կենտրոնական մարզական ակումբ, որտեղ ըմբիշը և կծանոթանա ռազմական գործին և կշարունակի մարզվել»,- ոլորտի խնդիրներին անդրադառնալով` ասաց Լևոն Ջուլֆալակյանը։
Հիմա գործում է սպորտային վաշտը, որտեղ բանակային ծառայությունն են անցնում աշխարհի կամ Եվրոպայի առաջնությունների մինչև վեցերորդ տեղ զբաղեցրած ըմբիշները: Իսկ յոթերորդ տեղում հայտնված մարզիկը արդեն մեկնում է բանակ:
«Նման մարզիկներից շատերը այլևս սպորտ չեն վերադառնում: Մենք բավականին լուրջ կորուստներ ենք ունենում ոչ միայն մարզական առումով: Նման ըմբիշների վրա ահռելի գումարներ են ծախսվում մարզելու ու նախապատրաստելու համար: Հետևաբար ստացվում է, որ տուժում ենք նաև ֆինանսապես, բացի նրանից, որ սպորտային առումով էլ ենք կորցնում»,- ասաց Ջուլֆալակյանը:
Ըստ մեր հավաքականի գլխավոր մարզչի հունահռոմեականներն արդեն սկսել են նախապատրաստվել ոչ միայն 2017-ի մրցումներին, այլ արդեն սկսվում է հաջորդ օլիմպիական խաղերին: Հաստատ կարելի է ասել, որ մեր հավաքականը ունի մեծ ներուժ, բայց հաշվից դուրս չպետք է թողնել նաև այն խնդիրները, որոնց մասին խոսեց հավաքականի գլխավոր մարզիչը:
Լևոն Ջուլֆալակյանը խոսել է նաև Հայաստանի հունահռոմեական և ազատ ոճի ըմբշամարտի հավաքականների ծաղկաձորյան ուսումնամարզական հավաքի մասին։