ԵՐԵՎԱՆ, 10 մարտի — Sputnik. Մարտի 9-ին կայացած «Մանչեսթեր Յունայթեդ»-«Ռոստով» հանդիպումն ավարտվեց 1։1 հաշվով։ Գոլի հեղինակ դարձած Հենրիխ Մխիթարյանը sports.ru-ին տված հարցազրույցում նշել է, որ լիովին գոհ չէ խաղի արդյունքից։
«Չեմ կարող ասել, որ լիովին գոհ եմ արդյունքից, բայց արդեն ոչինչ չես փոխի։ Մենք պետք է պատրաստվենք պատասխան խաղին։ Կարծում եմ` Մանչեսթերում ավելի լավ կխաղանք և լավ արդյունքի կհասնենք»։
Քանի որ Մխիթարյանը խաղադաշտ էր դուրս եկել վնասվածքից հետո, ֆուտբոլիստն անդրադարձել է նաև այդ թեմային։
«Ուրախ եմ, որ կարողացա դադարից հետո կայացած հենց առաջին խաղում գոլ խփել։ Շնորհակալ եմ գործընկերներիս, որ ամբողջ խաղի ընթացքում սատարեցին ինձ։ Կաշխատեմ հնարավորին չափ արագ վերականգնել մարզավիճակս»։
Նա շնորհակալություն է հայտնել նաև Դոնի Ռոստովում ապրող հայերին։
«Կարծում եմ` ես նրանց լավ նվեր մատուցեցի` գոլի տեսքով (ժպտում է)։ Հուսամ` նրանք հաճույք ստացան խաղից։
Նշենք, որ այս խաղից հետո ՈՒԵՖԱ-ն Եվրոպայի լիգայի 1/8 եզրափակչի լավագույն ֆուտբոլիստ է ճանաչել Հենրիխ Մխիթարյանին։
