ԵՐԵՎԱՆ, 24 մարտի — Sputnik. Ղազախական ֆուտբոլի մակարդակը վերջին տարիներին անընդհատ աճում է: ՀՖՖ պաշտոնական կայքում հրապարակված հարցազրույցում ասել է Հայաստանի ֆուտբոլի ազգային հավաքականի խաղացող Գևորգ Ղազարյանը։
«Դեռևս այն ժամանակ, երբ ես այնտեղ էի խաղում, թիմերն արդեն բավականին ուժեղացել էին: «Շախտյորի» հետ մենք դուրս եկանք Եվրոպա լիգայի խմբային փուլ: Դրանից հետո առաջնությունն էլ ավելի է ուժեղացել, ինչի ապացույցը «Աստանայի»՝ նախորդ մրցաշրջանի ելույթներն են Չեմպիոնների լիգայի խմբային մրցաշարում»,- ասել է Ղազարյանը։
Թիմերի միջև վերջին հանդիպումը տեղի է ունեցել 2012 թվականին: Ֆուտբոլիստը հիշում է, որ հայերն այդ հանդիպման առաջին խաղակեսում լուրջ առավելություն էին ստացել։
«Ես դարձա 2 գոլի հեղինակ, որոնցից մեկը շատ գեղեցիկ ստացվեց: Այդ ժամանակ մեր հավաքականը գերազանց մարզավիճակում էր, և այդ խաղը սկզբից մինչև վերջ շատ հաջող ստացվեց մեզ համար»,- ասել է նա:
Ղազարյանն անդրադարձել է նաև Ղազախստանի հետ առաջիկա հանդիպմանը։
«Չնայած Ղազախստանի հավաքականը վերջին տարիներին առաջադիմել է և ավելի ուժեղ է, քան մի քանի տարի առաջ, բայց մեր նպատակն այս խաղում միայն հաղթելն է: Պետք է փորձենք զարգացնել մեր հաջողությունը: Ֆուտբոլում ամեն ինչ պատահում է, բայց ցանկանում ենք գեղեցիկ և գոլառատ հանդիպում պարգևել մեր երկրպագուներին»,- ասել է նա:
Հայաստան-Ղազախստան հանդիպումը կկայանա այս կիրակի` մարտի 26-ին։
