ԵՐԵՎԱՆ, 23 մարտի — Sputnik. Հայաստանի հավաքականի գլխավոր մարզիչ Արթուր Պետրոսյանը գոհ է իր սաների ելույթից՝ Ղազախստանի հետ խաղում: Նա նշեց, որ հավաքականի համար ամենացավալի պահը կիսապաշտպան Գևորգ Ղազարյանի վնասվածք ստանալն էր: Նա այժմ գտնվում է հիվանդանոցում:
«Նա մեզ պետք է որպես մարդ և որպես ֆուտբոլիստ», — ասաց Պետրոսյանը: Մեկնաբանելով հանդիպումը՝ մարզիչն ասաց, որ երկրորդ խաղակեսում ֆուտբոլիստները լավ ճնշում գործադրեցին և ցուցադրեցին հարձակողական ֆուտբոլ:
«Երկրորդ խաղակեսում այդքան լավ չսկսեցին խաղը, բայց կարմիր քարտը տեղին էր: Շատ դեպքերում մեր հավաքականի հարձակման եզրափակիչ փուլը չէր ստացվում», — ասաց Պետրոսյանը:
Նա հավելեց, որ դեռ շատ անելիք կա: Պետրոսյանի խոսքով՝ կիսապաշտպաններ Հենրիխ Մխիթարյանը և Մարկոս Պիզելին կենտրոնացել են գրոհների վրա և ուժերի ներածին չափով խաղացել: Ինչ վերաբերում է Օզբիլիսին, ապա նա 100 տոկոսով պատրաստ չէր, ուստի դաշտ էր դուրս եկել որպես փոխարինող:
Ղազախստանի հավաքականի գլխավոր մարզիչ Ալեքսանդր Բորոդյուկն իր հերթին նշեց, որ Ղազախստանի հավաքականի խաղացողները նորմալ կատարել են խաղի պլանը և երկրորդ խաղակեսում կարող էին հավասարեցնել հաշիվը, բայց հեռացումն իր գործն արել է:
Նրա խոսքով՝ Մխիթարյանն իսկապես լավ ֆուտբոլիստ է, որը հաստատում է իր պրոֆեսիոնալիզմն՝ ինչպես ակումբային, այնպես էլ ազգային մակարդակներում: Նա հաջողություն մաղթեց Հայաստանի հավաքականին 2018թ-ի աշխարհի առաջնության ընտրական փուլում:
