ԵՐԵՎԱՆ, 27 հունիսի — Sputnik. Հաղորդավարուհի և 2018 թվականի ֆուտբոլի աշխարհի առաջնության դեսպան Վիկտորյա Լոպիրևան «Կոմսոմոլսկայա պրավդա» թերթի հետ հարցազրույցում պատմել է, թե որ ֆուտբոլիստներին է համարում իրենց գործի վարպետ։
Նա նշել է, որ երբ ֆուտբոլում երկար տարիներ ես անցկացնում, ապա մարդկանց դիտարկում ես որպես իրենց մասնագիտության վարպետներ, այլ ոչ թե նրանց արտաքին տվյալները։
«Սա գեղեցկության մրցույթ չի…Արտասահմանյան խաղացողներից Սերխիո Ռամոսն է և Լիոնել Մեսսին։ Իհարկե, հպարտություն է առաջացնում Հենրիխ Մխիթարյանը, որը հիմա «Մանչեսթեր Յունայթեդում» է խաղում»,– պատմել է Լոպիրևան։
Հաղորդավարուհին նշել է, որ Մխիթարյանը հետխորհրդային տարածքի միակ ֆուտբոլիստն է, որն այդպիսի հաջողությունների է հասել։
Հունիսի կեսին Լոպիրևան մի քանի օր է անցկացրել Հայաստանում։ Նրա ուղեկցորդը հենց հայ կիսապաշտպան Հենրիխ Մխիթարյանն էր։ Ավելի ուշ Facebook սոցիալական կայքում նա շնորհակալություն է հայտնել Մխիթարյանին ջերմ ընդունելության համար և հայերեն հավելել. «Հայաստանը գեղեցիկ երկիր է, որտեղ հրաշալի մարդիկ են ապրում: Շնորհակալություն ձեզ ջերմ ընդունելության համար»։