«Ալաշկերտ» - ԲԱՏԷ. հայկական թիմի հաջողության ակնկալիքով

ԵՐԵՎԱՆ, 18 հուլիսի — Sputnik, Խաչիկ Չախոյան. Երևանյան խաղում «Ալաշկերտին» բավական է անառիկ պահել սեփական դարպասն, ու այդ դեպքում անկախ նրանից, թե ինչպես կավարտվի հանդիպումը, Հայաստանի չեմպիոնն առաջինը հայկական ակումբներից իրավունք կստանա հանդես գալու Չեմպիոնների լիգայի որակավորման երրորդ փուլում:

Թիմերի առաջին խաղում ԲԱՏԷ-ն բավականին լուրջ առավելություն ուներ, մասնավորապես, առաջին կեսում: Բայց մրցակցին միայն մեկ անգամ հաջողվեց հասնել արդյունքի: Ընդմիջումից հետո գոլի հեղինակ դարձած Ալեքսեյ Ռիոսը ևս մեկ անգամ գրավեց դարպասը, բայց այս անգամ՝ սեփականը: Այդպիսով խաղն ավարտվեց ոչ-ոքի՝ 1:1 հաշվով:

Ինչպես և առաջին խաղից առաջ, հիմա էլ բուքմեյքերներն ու շատ մասնագետներ հաղթանակի հասնելու հնարավորությունները ավելի բարձր են տեսնում ԲԱՏԷ-ի համար: Բայց ֆուտբոլը մնում է ֆուտբոլ, ու ուժեղը շատ հաճախ չի հաղթում հաջողակին: Հուսանք, որ հաջողակը կլինի մեր թիմը:

Խաղից առաջ կայացած մամլո ասուլիսների ժամանակ երկու թիմերի մարզիչները՝ Աբրահամ Խաշմանյանն ու Ալեքսանդր Երմակովիչը, նշեցին, որ անկախ առաջին խաղի արդյունքից՝ թիմերը պատրաստ են այս խաղում հաղթանակի հասնելուն: ԲԱՏԷ-ի կազմում, ինչպեսև առաջին խաղու,մ բացակայելու է թիմի ավագ Վիտալի Ռադիոնովը: Իսկ ահա «Ալաշկերտը» ավելի լուրջ խնդիրներ ունի այդ առումով:

Առաջին խաղի վերջնամասում Արթուր Եդիգարյանը վնասվածք ստացավ ու փոխարինվեց: Ինչպես նախօրեին նշեց Աբրահամ Խաշմանյանը, Արթուր Եդիգարյանի մասնակցությունը շատ մեծ հարցականի տակ է: Եվս մեկ առանցքային ֆուտբոլիստ՝ Արտակ Գրիգորյանը, որը վնասվածք էր ստացել «Սանտա Կոլոմայի» խաղի ժամանակ, արդեն ապաքինվել է, բայց նրա մասնակցությունն էլ դեռևս հաստատված չէ:

Ստացվում է, որ «Ալաշկերտը» հենակետային գոտում լուրջ խնդիրներ կունենա, եթե այս երկու ֆուտբոլիստները չմասնակցեն խաղին: Սա գլուխկոտրուկ է Աբրահամ Խաշմանյանի համար, բայց այլ տարբերակ չկա, պետք է ելք գտնել ու մտածել արդյունքի մասին: Էական չէ, թե խաղն ինչպիսի հաշվով կավարտվի: Հիմա կարևորը արդյունքն է: Ու արդյունքի, այսինքն՝ երկու հանդիպումների համագումարում հաղթանակի պարագայում «Ալաշկերտը» պատմական արդյունքի կհասնի:

Բելառուսում նշում են, որ իրենց թիմի համար շատ դժվար է լինելու շոգ եղանակին լավ խաղ ցուցադրելը: Իհարկե, շոգը որոշակի դժվարություններ կարող է առաջացնել հյուրերի համար, բայց ուզում ենք հավատալ, որ մրցակցի համար անհաղթահարելի արգելք է հանդիսանալու ոչ թե եղանակը, այլ Հայաստանի չեմպիոն «Ալաշկերտը»:

Sputnik Արմենիան խաղը կներկայացնի տեքստային ուղիղ հեռարձակմամբ։