ԵՐԵՎԱՆ, 20 սեպտեմբերի — Sputnik. Շախմատի աշխարհի գավաթի խաղարկության կիսաեզրափակիչ փուլում Լևոն Արոնյան-Մաքսիմ Վաշյե Լագրավ երկրորդ պարտիան նույնպես ավարտվեց խաղաղությամբ:
Երկրորդ պարտիան էլ առաջինի նման արագ ավարտ ունեցավ: Այս անգամ կողմերը ընդամենը 19 քայլ կատարեցին: Սպիտակներով խաղացող Մաքսիմ Վաշյե Լագրավը չկարողացավ հաղթահարել Արոնյանի գրագետ պաշտպանությունը:
Այսպիսով, կիսաեզրափակիչում արդեն հայ և ֆրանսիացի գրոսմայստերները մրցելու են թայ բրեկում: Նախ անցկացվելու է արագ շախմատի երկու պարտիա (25 րոպե 10 վայրկյանանոց ավելացումով), ու թե այստեղ էլ հաղթողը չորոշվի, ապա շախմատիստները կանցկացնեն կայծակնային շախմատի երկու պարտիա (10 րոպե 10 վայրկյանանոց ավելացումով):
Հնարավոր է, որ պայքարը շարունակվի նույնիսկ կայծակնային շախմատից հետո: Այդ դեպքում կանցկացվի բլից (5 րոպե 3 վայրկյանանոց ավելացումով): Վերջապես, եթե այստեղ էլ կողմերը հաղթողին չորոշեցին, ապա այսպես կոչված «մահվան» պարտիաներ կանցկացվեն, որոնցում սպիտակներով խաղացողը կունենա 5, իսկ սևերով խաղացողը` չորս րոպե: Բայց այս դեպքում արդեն ոչ-ոքին կհամարվի որպես սևերի հաղթանակ:
Վաղը Արոնյանն ու Վաշյե Լագրավը կսկսեն արագ շախմատից: