ԵՐԵՎԱՆ, 22 սեպտեմբերի — Sputnik. «Արարատ» թիմի մարզիչ Ալեքսանդր Գրիգորյանը, որի թիմը պարտվեց «ՍԿԱ–Խաբարովսկ» խաղի ժամանակ, վրդովված է երկրպագուների պահվածքից, որոնք վիրավորական խոսքեր էին հնչեցնում նրա հասցեին։
Հինգշաբթի Մոսկվայի «Արարատը» Ռուսաստանի գավաթի 1/16 եզրափակչի խաղում 1:2 հաշվով պարտվեց «ՍԿԱ–Խաբարովսկ»-ին։
Հանդիպման ընթացքում Խաբարովսկի ակումբի երկրպագուները մի քանի անգամ վիրավորական արտահայտություններ են արել և այդպիսով սադրել «ՍԿԱ–Խաբարովսկի» նախկին մարզչին։ Արդյունքում նա անհարգալից ժեստ է ցույց տվել հեռավորարևելյան թիմի երկրպագուներին։
Анонс пресс-конференции Григоряна pic.twitter.com/SVpKhsm0XA
— Егор Кузнецов (@egorkuznets) 21 сентября 2017 г.
«Կարծում եմ, որ ՍԿԱ–ի երկրպագուների հետ ինչ-որ մեկը աշխատանքներ է տանում, քանի որ միայն խելագար մարդը կամ վերջին տականքը կարող էր բարոյական առումով նման կերպ վերաբերվել մարզչին։ Առողջ մտածելակերպով մարդը նման արտահայտություններ իրեն թույլ չի տա։ Ես կարող էի ասել, թե ովքեր են նրանք, սակայն ժամանակ կանցնի և կասեն, որ Գրիգորյանը լավագույն մարզիչն է եղել»,– ասել է Գրիգորյանը։
Բացի այդ, մարզիչը նշել է, որ «ՍԿԱ–Խաբարովսկի» մակարդակը թույլ չտվեց «Արարատին» ցուցադրել ամբողջ կարողությունը։
«Առաջին խաղակեսում հյուրընկալված թիմն ակնհայտ առավելություն ուներ, ընդմիջման ընթացքում մեզ հաջողվեց որոշակի շտկումներ անել և հանդիպման երկրորդ կեսում գոլ խփել։ Պետք է նշել, որ հակառակորդի մակարդակը մեզ թույլ չտվեց ցուցադրել մեր ամբողջ կարողությունն ու հաղթել։ Կարծում եմ, որ այսօր մեզ չի կարելի մեղադրել վատ խաղի մեջ, թիմը փորձում էր անել հնարավոր ամեն բան, սակայն, ցավոք, չստացվեց»,– ասել է Գրիգորյանը։
«Արարատ» ակումբը հիմնադրվել է 2017 թվականի մարտին։ «Արարատի» թիմում հանդես են գալիս Ռոման Պավլյուչենկոն, Մարատ Իզմայլովը, Իգոր Լեգեդենկոն և այլ հայտնի ֆուտբոլիստներ։
