ԵՐԵՎԱՆ, 1 նոյեմբերի — Sputnik. «Մանչեսթեր Յունայթեդի» և Հայաստանի հավաքականի կիսապաշտպան Հենրիխ Մխիթարյանը խոստովանել է, որ մանկության տարիներին երկրպագել է «Սպարտակ» ֆուտբոլային ակումբին։ Ֆուտբոլիստն այս մասին խոսել է «Մատչ ТВ» հեռուստաընկերության հետ զրույցում։
Նրա խոսքով, երբ փոքր է եղել, տարվա մի քանի ամիսն անցկացրել է Մոսկվայում բնակվող տատի մոտ։
«Այն ժամանակ շատ էի երկրպագում «Սպարտակին»։ Այժմ ոչ միայն հետևում եմ Ռուսաստանի, այլև Հայաստանի և Ուկրաինայի առաջնություններին»,- ասել է Մխիթարյանը։
Խոսելով կարիերայի մասին` նա նշել է, որ «Մանչեսթեր Յունայթեդի հետ» պայմանագիր կնքելուց հետո, ասես, երազում է հայտնվել, չի հավատացել, որ դա իր հետ է տեղի ունենում։
«Իհարկե, շատ էի ուրախացել, մի քանի շաբաթ չէի կարողանում ուշքի գալ։ Երբ ես խաղում էի «Մետալուրգում», շրջապատող մարդիկ կասկածում էին, որ ես կհասնեմ «Յունայթեդ» ու «Դորտմունդ»։ Բայց ես պատրաստ եմ հաղթահարել դժվարությունները։ Դրանք ավելի ուժեղ են դարձնում»,- ասել է մարզիկը։
Մխիթարյանի խոսքով` հաջողության հասնելու ճանապարհը հեշտ չի եղել, եղել են օրեր, երբ նա լացելու ցանկություն է ունեցել։ Հուսահատվել է, բայց հաջորդ օրը կրկին դուրս է եկել խաղադաշտ ու մարզվել։ Նրա խոսքով` սիրած գործին տրվել է 100 տոկոսով։
Խոսելով Ժոզե Մոուրինյոյի մասին` Հենրիխը նշել է, որ այդ մարզչին քչերն են սիրում, բայց նա ուժեղագույններից մեկն է աշխարհում։ Ֆուտբոլիստը նշել է` բոլորի կողմից սիրված լինել հնարավոր չէ, բայց Մոուրինյոն դրական կողմեր շատ ունի։
