ԵՐԵՎԱՆ, 9 նոյեմբերի – Sputnik, Խաչիկ Չախոյան. Հայաստանի ֆուտբոլի ազգային հավաքականը Արաս Օզբիլիսի, Հենրիխ Մխիթարյանի, Ռումյան Հովսեփյանի և Էրիկ Վարդանյանի գոլերի շնորհիվ 4:1 հաշվով հաղթանակի հասավ Բելառուսի ընտրանու նկատմամբ ընկերական մրցավեճում:
Առաջին խաղակեսի վերջին երեք րոպեի ընթացքում մերոնք երկու անգամ հասան հաջողության: Հենրիխ Մխիթարյանի մոտ չստացվեց հարվածը ո՛չ նշանակետին, ո՛չ էլ դարպասապահի հետ մղելուց հետո, բայց վրա հասած Արաս Օզբիլիսը բացեց հաշիվը: Իսկ 45-րդ րոպեին Էդգար Մալաքյան-Տիգրան Բարսեղյան-Հենրիխ Մխիթարյան եռաքայլ կոմբինացիան ավարտվեց մեր ավագի դիպուկ հարվածով: Մխիթարյանը խփեց իր 24-րդ գնդակը Հայաստանի հավաքականի կազմում:
Անկասկած, առաջին կեսի վերջնամասը սառը ցնցուղ էր բելառուսների համար: Ունենալով գոլային պահերով զգալի առավելություն` հյուրերը պարտվում էին 0:2 հաշվով: Բացի այդ էլ երկրորդ կեսի սկզբում Ռումյան Հովսեփյանը երրորդ գնդակն ուղարկեց մրցակցի դարպաս: Ինտրիգը խաղ վերադարձավ շատ արագ, քանի որ վրացի մրցավարը 11 մետրանոց նշանակեց Հայաստանի հավաքականի դարպասին, ու Անտոն Սարոկան կրճատեց հաշիվը:
Հանդիպման ընթացքում Արթուր Պետրոսյանը խաղադաշտ դուրս բերեց համարյա բոլոր նորեկներին: Հայկ Իշխանյանն ու Էրիկ Վարդանյանը խաղաժամանակ ստացան, իսկ «Փյունիկի» երիտասարդ ֆուտբոլիստ Էրիկ Վարդանյանը շատ գեղեցիկ գոլի հեղինակ դարձավ վերջակետ դնելով այս հանդիպմանը՝4:1:
Մինչ այս հանդիպումը կողմերը վեց անգամ մրցել էին իրար դեմ ու Բելառուսն ուներ երեք հաղթանակ, ևս երկու հանդիպում էլ ավարտվել էր ոչ-ոքի արդյունքով: Այս վիճակագրությունը մեր ընտրանին փոխեց իր օգտին` երկրորդ հաղթանակը տոնելով բելառուսների նկատմամբ:
Հայաստանի ազգային հավաքականը Բելառուսի ընտրանու հետ խաղով, կարելի է ասել, նոր փուլ սկսեց: Մեր թիմը սկսում է նախապատրաստվել գալիք ընտրական հանդիպումներին: Պարզ է, որ ընկերական խաղերը շատ մեծ նշանակություն ունեն, առավել ևս, որ հավաքականի մարզիչն աշխարհի 2018 թվականի ընտրական մրցաշարն անհաջող անցկացնելուց հետո հայտարարեց, որ հավաքականին նոր արյուն է հարկավոր:
Տեղին է նշել, որ Բելառուսի հավաքականն էլ աշխարհի 2018 թվականի ընտրական մրցաշարը մեր թիմի պես ձախողել էր. ու մրցակցի համար էլ այս խաղը մեծ նշանակություն ուներ ապագայի հետ կապված: Եվ առաջին խաղակեսում չնայած նրան, որ մեր թիմը երկու գնդակի առավելություն ստացավ, գնդակ խփելու անհամեմատ ավելի մոտ էին բելառուսները: Պավել Նեխայչիկը, Պավել Սեդկոն, Նիկիտա Նաումովը, Մաքսիմ Վոլոդկոն չիրացրին իրենց գոլային պահերը, և մրցակիցը պատժվեց:
Իհարկե, անկախ հանդիպման բնույթից (չմոռանանք խաղն ընկերական էր), և բացի այդ էլ մրցակիցը ուժեղների շարքից չէր, արդյունքը միանշանակ կարևոր է: Պարզ երևաց, որ մեր հավաքականը կայուն խաղ ցուցադրելու համար դեռ շատ աշխատանք ունի կատարելու: Իհարկե, հաղթողներին չեն քննադատում, բայց կարծում եմ` այս հաղթանակից հետո էլ պետք է հետևություններ անել:
