ԵՐԵՎԱՆ, 18 նոյեմբերի — Sputnik. Բոլորը կատակում են, թե հայերն են «քարշ տալիս» Ռուսաստանի հավաքականը: Այդ մասին Ռուսաստանի երիտասարդ հավաքականի հարձակվող Ալեքսեյ Փոլադյանն ասել է Ռուսաստանի հոկեյի ֆեդերացիային տված հարցազրույցի ժամանակ:
«Ռուսաստանում միայն ծույլերը չէին կատակում այն մասին, թե հայերն են քարշ տալիս երիտասարդ հավաքականին: Հավաքականում դա հայտնի թեմա էր: Տղաները լավ էին կատակում այդ կապակցությամբ, այնպես որ, մենք դեմ չէինք»,- ասաց մարզիկը:
Փոլադյանը նաև ամփոփեց Կանադայի պատանեկան լիգաների հավաքականների հետ Սումերսերիայի արդյունքները և պատմեց, թե ինչ զգացողություն է համակում, երբ բարդ խաղում հաղթանակ ես տանում, սակայն պարտվում ես բուլիտներով (տուգանային հարված դարպասներին, այսպես կոչված՝ 11-մետրանոց հոկեյում):
«Վերջին խաղից դրական զգացողություններ են մնացել, քանի որ բնավորություն ենք ցույց տվել, հաղթել խաղում: Իհարկե, կցանկանայինք հաղթել նաև սերիայում, սակայն բուլիտները միշտ վիճակախաղ են, որում այս անգամ մենք պարտվեցինք: Փորձում ենք չկենտրոնանալ դրա վրա»,- ասաց աստղը:
Փոլադյանը նշել է նաև, որ եռյակի խաղընկերների հետ փոխըմբռնումն օգնում է հիանալի արդյունք ցույց տալ:
Ավելի վաղ Ռուսաստանի հավաքականի կազմում խաղացող հայազգի հոկեյիստներ Արտյոմ Մանուկյանն ու Ալեքսեյ Փոլադյանը օգնել են Ռուսաստանի հոկեյի երիտասարդական հավաքականին փայլուն հաղթանակ տանել Կանադայի հավաքականի նկատմամբ: Այդ հաղթանակից հետո հեկոյիստները գովասանքի արժանացան ռուսական ԶԼՄ-ների մեծ մասի կողմից, որոնք Մանուկյան-Փոլադյան դուետը «հայկական պոկեր» անվանեցին: