ԵՐԵՎԱՆ, 26 նոյեմբերի — Sputnik. Պալմա դե Մալյորկայում անցկացվող ՖԻԴԵ-ի «Գրան պրի» խաղարկության եզրափակիչ փուլում Լևոն Արոնյանն ու Պավել Յակովենկոն հնարավոր 9 միավորից վաստակեցին 5,5-ական միավոր, և հայտարարվեցին մրցաշարի հաղթողներ: Սակայն մրցաշարի կազմակերպիչները նրանց միջև թայ-բրեյք անցկացրեցին, որի ժամանակ ուժեղ դուրս եկավ ռուս գրոսմայստերը:
Այդպիսով, մրցաշարային վերջնական աղյուսակում, հավասար միավորներ ունենալով, առաջատարն է Պավել Յակովենկոն:
Նշենք, որ երկու հաղթողներն էլ հավասար հոնորար կստանան` 17 500 եվրո:
Ավելի վաղ հայտնել էին, որ լրացուցիչ ցուցանիշներով մրցաշարի հաղթող է ճանաչվել Լևոն Արոնյանը:
Սակայն կազմակերպիչները որոշեցին թայ-բրեյք անցկացնել, որի հաղթողը դարձավ մրցաշարային աղյուսակի առաջատարը:
Լևոն Արոնյանն իր անհատական վարկանիշին ավելացրեց 3,8 միավորով, և այժմ այն 2808,8 է կազմում: Այդ ցուցանիշով Արոնյանը ներկա պահին զիջում է միայն Աշխարհի չեմպիոն Մագնուս Կարլսենին (2837):
