ԵՐԵՎԱՆ, 26 դեկտեմբերի — Sputnik. Միլանի «Ինտերի» մարզական տնօրենը կապ է հաստատել Մինո Ռայոլայի` Հայաստանի հավաքականի ավագ Հենրիխ Մխիթարյանի գործակալի հետ, հայտնում է fcinternews.it հարթակը, որը նվիրված է FC Internazionale-ին։ «Մանչեսթեր Յունայթեդում» խոստացել են աջակցել տրանսֆերին։
Աղբյուրի տվյալների համաձայն` «Ինտերը» դրական արձագանք է ստացել։
«Ավելին` «Մանչեսթեր Յունայթեդը» չի խոչընդոտելու հայ կիսապաշտպանի` վարձակալության հիմունքներով տրանսֆերը», — գրում է հարթակը։
«Կարմիր սատանաների» մարզիչ Ժոզե Մոուրինյոն «Ինտերին» առաջնային տեղ է երաշխավորել Մխիթարյանի ծառայությունները ստանալու հարցում։
Վերջերս հայ ֆուտբոլիստ Հենրիխ Մխիթարյանը «Մանչեսթեր Յունայթեդում» լուրջ խնդիրներ ունի։ Ամենայն հավանականությամբ ձմռանը կիսապաշտպանը կլքի «կարմիր սատանաներին»։ Անգլիական ակումբը պատրաստ է Մխիթարյանից բաժանվել 35 միլիոն ֆունտ ստեռլինգի դիմաց։