ԵՐԵՎԱՆ, 7 փետրվարի — Sputnik. Գեղասահքի աշխարհի առաջնության կրկնակի չեմպիոն, գեղասահորդուհի Եվգենյա Մեդվեդևա-Բաբասյանը դարձել է Առաջին ալիքով ցուցադրված հինգրոպեանոց տեսահոլովակի գլխավոր հերոսուհին։ Տեսահոլովակը նվիրված է ռուս մարզիկներին։
Ֆիլմը պատմում է նրա ամենօրյա մարզումների, ապշեցուցիչ ելույթների և հետաքրքրությունների մասին։
Սառույցի վրա մրցակիցներ, իսկ կյանքում ընկերուհիներ Ալինա Զագիտովան և Եվգենյա Մեդվեդևան մարզվում են նույն մարզչի` Էթերի Տուտբերիձեի մոտ։ Մոսկվայում կայացած Եվրոպայի առաջնությունում Եվգենյան դարձել է արծաթե մեդալակիր` Զագիտովային զիջելով ոսկե մեդալը։ Երկու աղջիկները Ռուսաստանը կներկայացնեն Փհենչհանի օլիմպիական խաղերում` կանանց մենասահքում։
Առաջին ալիքը տաղանդավոր մարզիկների ճակատագիրը համեմատում է հայտնի գեղասահորդների` Ալեքսեյ Յագուդինի և Եվգենի Պլյուշչենկոյի հետ։
Երկու ռուս գեղասահորդներն էլ մարզվել են մեկ մարզչի` լեգենդար Տատյանա Տարասովայի մոտ։ 2002թ-ին Պլյուշչենկոն և Յագուդինը մրցել են Սոլթ Լեյք Սիթիի օլիմպիադայում։ Այդ ժամանակ հանդիսատեսին ապշեցրել է Պլյուշչենկոյի տեխնիկական սահքը և Յագուդինի զգացմունքային ելույթը։ Ալեքսեյը շահել է ոսկի, իսկ Եվգենին` արծաթ։
Այսօր կանխատեսում են, որ Մեդվեդևան օլիմպիադայում կհաղթի և, ինչպես Յագուդինը, նա էլ կվերադառնա ոսկե մեդալով, իսկ Զագիդովան` արծաթով։
Սա երկու մարզիկների ճակատագրում միակ զուգադիպությունը չէ, նրանք շատ ընդհանրություններ ունեն. զգացմունքային ծրագիրն ինչպես Յագուդինի, այնպես էլ Մեդվեդևայի գլխավոր հաղթաթուղթն է։
Եթե Ալեքսեյը ժամանակին շաղ էր տալիս ձյունը և ժպտում հանդիսատեսին, ապա Եվգենյան նոր հնարք է կիրառում գեղասահքում։
2016թ-ին Մեդվեդևան դիմել է հանդիսատեսին. «Ես ձեզ չեմ լսում, մարմինս փշաքաղվում է նրանից, որ ես ձեզ սրտով եմ զգում։ Ես ձեզանից չեմ վախենում, ես ձեր առաջ բացվում եմ»։ Այդ ամենը նա ասել է ժեստերի լեզվով։
«Մեր սպորտը կիսով չափ արվեստ է։ Մենք ամեն օր կերտում ենք մեզ», — պատմել է Ռուսաստանի ամենագեղեցիկ գեղասահորդուհիներից մեկը։
Աղջիկը նշել է, որ ամեն օր հայելու առաջ մշակում է ծրագիրը։ Եվգենյան սովորել է ամեն ինչ արտահայտել ոչ թե բառերով, այլ մարմնի լեզվով։ Նրա ելույթները միշտ տարբերվում են զգայական շարժումներով և փակ աչքերով։
«Այն պահերին, որոնք հոգեհարազատ են ինձ, ես փակում եմ աչքերս… Ես փակում եմ աչքերս, որովհետև չեմ ուզում կորցնել այդ ակնթարթը», — ասել է Մեդվեդևան։
Գեղասահորդուհին երբեք չի բաժանվում իր սիրելի փափուկ խաղալիքից` մեծ աչքերով սև կատվից։ Այդ խաղալիքը «Սեյլոր Մուն» ճապոնական մուլտսերիալի կերպար է` ուսուցիչ կատու Լունան։ Անիմեի հերոսի նման Լունեն երբեք չի լքում հայտնի գեղասահորդուհուն։ Մեդվեդևան բազմիցս է խոսել անիմեի հանդեպ սիրո մասին (ճապոնական մուլտֆիլմերի)։ Ազատ ժամանակ նա նկարում է սիրելի մուլտֆիլմերի կերպարներին։
Մեդվեդևան նաև պատմել է, որ նախկինում բուռն զգացմունքներ չի ապրել հաղթանակի ժամանակ, բայց հիմա աննկարագրելի ուրախություն է զգում հանդիսատեսի աջակցությունից։
«Հիմա ես շատ շնորհակալ եմ յուրաքանչյուրին», — նշել է Եվգենյան։
Սակայն միայն անկեղծությունը բավարար չէր լինի երեք համաշխարհային ռեկորդների համար. նա երկու անգամ հաղթել է Ռուսաստանի, Եվրոպայի և աշխարհի առաջնություններում։ Եվգենյան համարվում է մոլորակի ամենալավ տեխնիկա ունեցող գեղասահորդուհիներից մեկը։ Կարելի է միայն նախանձել, թե ինչպես է նա կարողանում հանդարտ դեմքով այդքան բարդ հնարքներ կատարում սառույցի վրա։
