ԵՐԵՎԱՆ, 12 մարտի — Sputnik. «Արսենալի» կիսապաշտպանի խաղը Whoscored.com մարզական-վիճակագրական կայքը գնահատել է 8,8, ինչը ամենաբարձր ցուցանիշն է երկու թիմերի խաղացողների շրջանում:
8,8 գնահատականին արժանացել է նաև «Արսենալի» դարպասապահ Պետր Չեխը, որը խաղի ընթացքում ետ մղեց 11 մ հարվածը: Սակայն նա լրացուցիչ վիճակագրական հաշվարկներով զիջել է Մխիթարյանին: Հայաստաnի հավաքականի ավագ Հենրիխ Մխիթարյանը ճանաչվել է Անգլիայի Պրեմիեր-լիգայի 30-րդ տուրում «Ուոթֆորդի» հետ հանդիպման (3:0) լավագույն խաղացող:
Հիշեցնենք, որ Մխիթարյանը այդ խաղում դարձավ գոլի և գոլային փոխանցման հեղինակ: Խաղն ավարտվել է «զինագործների» հաղթանակով՝ 3։0 հաշվով։ 8-րդ րոպեին հաշիվը բացել է պաշտպան Շկոդրան Մուսթաֆին, թիմերը ընդմիջման են գնացել «Արսենալի» նվազագույն առավելությամբ։ Երկրորդ խաղակեսում լոնդոնցիները Հենրիխ Մխիթարյանի և Պյեր-Էմերիկ Օբամեյանգի ջանքերով հաշիվը դարձրել են 3։0։
59-րդ րոպեին Օբամեյանգը Մխիթարյանի կատարած փոխանցումից հետո գնդակն ուղարկել է «Ուոտֆոդի» դարպասը։ 18 րոպե անց աչքի է ընկել նաև Մխիթարյանը՝ փոխանցում ստանալով Օբամեյանգից։ Դարպասապահը չի կարողացել պահել տուգանայինից իրականացրած հարվածը։
Ի դեպ, Armsport.am-ի փոխանցմամբ՝ «Արսենալի» կիսապաշտպան Հենրիխ Մխիթարյանը խաղից հետո տված հարցազրույցում անդրադարձել է Անգլիայի առաջնության 30-րդ տուրում «Ուոթֆորդի» նկատմամբ տարած հաղթանակին:
«Իհարկե, նախորդ երեք խաղերում պարտվելուց հետո այսօր շատ դժվար էր մեզ համար: Պետք է ուժ գտնեինք երկրպագուներին ապացուցելու, որ եղածը պարզապես ձախորդություն էր», ասել է Մխիթարյանը:
Նա հավաստիացրել է, որ «Միլանի» հետ խաղից հետո թիմը որոշակի վստահություն է ձեռք բերել և դրանից էլ օգտվեց երեկվա խաղում:
«Շնորհակալություն Պետր Չեխին 11 մետրանոց հարվածից հետո մեզ փրկելու համար: Դա շատ կարևոր էր, քանի որ կարող էր փոխել խաղի ելքը, և մրցակիցը կարող էր նաև երկրորդ գնդակը խփել: Այդ դրվագից հետո ավելի վստահ դարձանք և կարողացանք երրորդ գնդակն էլ խփել»,- ասել է ֆուտբոլիստը հավելելով, որ միշտ վայելում է Օբամեյանգի հետ խաղը, դա նրա համար յուրահատուկ հնարավորություն է:
Մխիթարյանը վստահեցրել է, որ պետք է շարունակեն նման ոգով և որքան հնարավոր է շատ գոլի հեղինակ դառնան:
«Մենք միշտ խաղում ենք երկրպագուների համար, շնորհակալություն բոլոր նրանց, ովքեր իսկական ֆանատ են և գալիս են ստադիոն: Նրանց, ովքեր գալիս են ստադիոն միայն հաղթանակների համար, բան չունեմ ասելու»,-եզրափակել է նա:
