ԵՐԵՎԱՆ, 21 մարտի — Sputnik. Բաթումում ընթացող շախմատի Եվրոպայի անհատական առաջնության չորս տուրից հետո միանձնյա առաջատարը Հայաստանի ներկայացուցիչ Ռոբերտ Հովհաննիսյանն է։ Նա արդեն չորս հաղթանակ է գրանցել: Այս մասին հայտնում է Հայաստանի շախմատային ֆեդերացիան։
Բաթումում երեկ տեղի ունեցավ Եվրոպայի շախմատի անհատական առաջնության 4-րդ տուրը:
Մրցաշարի առաջատարների խմբում ընթացող մասնակիցներից միայն Հայաստանը ներկայացնող Ռոբերտ Հովհաննիսյանը կարողացավ հաղթանակ տոնել: Այս հաղթանակի շնորհիվ Հովհաննիսյանն իր ակտիվում 4 հնարավորից գրանցեց 4 միավոր և սկսեց միանձնյա գլխավորել աղյուսակը:
13 շախմատիստ, որոնց թվում է Հայկ Մարտիրոսյանը, 3.5-ական միավորով հետապնդում են առաջատարին: Նշենք, որ 4-րդ տուրում Մարտիրոսյանը հայկական դերբիում հաղթանակ տոնեց Հրանտ Մելքումյանի նկատմամբ: Գաբրիել Սարգսյանը և Արման Փաշիկյանը վաստակել են 3-ական միավոր:
Մրցաշարում հերթական հաճելի անակնկալը գրանցեց պատանի շախմատիստուհի Աննա Սարգսյանը, որը ոչ-ոքի խաղաց Ուկրաինան ներկայացնող միջազգային վարպետ Վասիլի Կորչմարի հետ:
Եվրոպայի շախմատի անհատական առաջնությունը Բաթումում մեկնարկել է մարտի 17-ին: Մրցաշարին մասնակցում է Հայաստանի 34 պատվիրակ: