ԵՐԵՎԱՆ, 30 ապրիլի — Sputnik, Խաչիկ Չախոյան. Դաղստանի Կասպիյսկ քաղաքում այսօր մեկնարկում է ըմբշամարտի Եվրոպայի առաջնությունը: Առաջինը մրցագորգ դուրս կգան հունահռոմեական ոճի ըմբիշները: Հայաստանը մրցումային առաջին օրը ներկայացնելու են երեք ըմբիշներ:
Եվրոպայի 2018 թվականի առաջնությունում մեր հանրապետությունը ներկայացված է լինելու յոթ քաշային կարգերում: Մեր հավաքականի կազմում մրցումներին մասնակցում են օլիմպիական խաղերի ու աշխարհի չեմպիոն Արթուր Ալեքսանյան, աշխարհի չեմպիոն Մաքսիմ Մանուկյանը:
Հավաքականի գլխավոր մարզիչ Լևոն Ջուլֆալակյանն այս անգամ ընտրանու կազմում չի ընդգրկել 55կգ, 72կգ և 130կգ քաշային կարգերի ըմբիշների: Այս քաշային կարգերում նման մրցաշարերում համապատասխան մակարդակի մարզիկներ չունենք:
Բնականաբար, մեր հավաքականի կազմում Եվրոպայի չեմպիոնի կոչման հիմնական հավակնորդները երկուսն են՝ Արթուր Ալեքսանյանն ու Մաքսիմ Մանուկյանը: Բայց ինչպես միշտ, մեր ընտրանու կազմում ընդգրկված յուրաքանչյուր ըմբիշ կարող է հասնել պատվո պատվանդանին: Եվ դա վերաբերվում է առաջին հերթին Կարապետ Չալյանին:
Հունահռոմեականների կազմում այսօր մրցագորգ դուրս կգան Սլավիկ Գալստյանը(63կգ), որի մրցակիցը առաջին գոտեմարտում լինելու է Բելառուսը ներկայացնող Ռախմատսիկխուդո Խայբարովը, Կարապետ Չալյանը(77կգ), ով առաջին գոտեմարտում մրցելու է իսրայելցի Իգոր Պետրիսնինի հետ և Արթուր Շահինյանը (87կգ), ով մեկնարկելու է իսպանացի Պեդրո Գարսիա Պերեսի հետ գոտեմարտով:
Վաղը կներկայանան նաև մյուս քաշային կարգերի ըմբիշները, իսկ հունահռոմեականների մրցաշարի ավարտից հետո մրցագորգը կտրամադրվի ազատ ոճային ըմբիշներին: Այս մրցաձևում Հայաստանը ներկայացված է լինելու բոլոր՝ տասը քաշային կարգերում:
Ազատ ոճի Հայաստանի հավաքականի կազմում ընդգրկված բոլոր ըմբիշներն էլ մեծ փորձ ունեն և մեկ անգամ չէ, որ կարողացել են մեդալ վաստակել Եվրոպայի կամ աշխարհի առաջնություններում
