ԵՐԵՎԱՆ, 13 հունիսի — Sputnik. Աշխարհի կրկնակի չեմպիոն Եվգենյա Մեդվեդևան Գորկու զբոսայգում Nike Box Msk մշակութամարզական կենտրոնի բացման արարողությունից հետո պատմել է, թե իր կյանքում ինչ դեր ունի ֆուտբոլը, խոսել է նաև կարիերայի ավարտից ունեցած ծրագրերի մասին։
Փհենչհանի Օլիմպիական խաղերի արծաթե մեդալակիր Մեդվեդևան (Բաբասյան) միջոցառմանը հրավիրվել էր երկու ականավոր խաղացողների հետ` բրազիլացի Ռոնալդոյի և ռուս Անդրեյ Արշավինի։ Մեդվեդևան վերջինն է զրուցել լրագրողների հետ, նրան հարցրել են` Ռոնալդոն ձեզ հետ արդեն լուսանկարվե՞լ է։
«Դեռ հարց է, թե ով ում հետ լուսանկարվեց։ Բայց, այո, մենք լուսանկարվեցինք որպես հիշատակ։ Նախկինում երբեք ֆուտբոլով չեմ հետաքրքրվել, չեմ հետևել խաղերին, չեմ կարող ասել, որ սիրելի ֆուտբոլիստ ունեմ, նման բան չկա, բայց կարող եմ ասել, որ մանկությանս ու պատանեկությանս տարիներին ֆուտբոլ եմ խաղացել երեխաների հետ պարի դահլիճում», — ասել է նա։
Մեդվեդևան նշել է` պարտադիր չէ խաղալ ֆուտբոլի գնդակով, երբեմն նույնիսկ թենիսի գնդակն էլ է բավարար, այդ դեպքում խաղը «մինի-մինի ֆուտբոլի» վերածվում։
«Գնդակի հետևից վազելն ինձ միշտ դուր է եկել», — ասել է գեղասահորդուհին։
Լրագրողները նաև հարցրել են, թե ինչով կցանկանար Մեդվեդևան զբաղվել կարիերայի ավարտից հետո։
«Երբեք չեմ սիրել մի քանի տարի առաջ կանխատեսումներ անել, բայց քանի որ բոլորս պետք է նայենք դեպի ապագան, հեռուստատեսությունում աշխատելը ապագա զբաղվածությանս հավանական տարբերակ եմ դիտարկում։ Չէ՞ որ ոչ ոք չգիտի, ինչ է լինելու հետագայում», —խոստովանել է Եվգենյան։
Մեդվեդևան ասել է, որ կուզեր մարզիչ աշխատել։ Նա պատմել է, որ սովորում է համալսարանի առաջին կուրսում`մարզչի մասնագիտություն ստանալու համար։
Եվգենյան նաև ընդգծել է, որ Ռուսաստանում անցկացվող Աշխարհի առաջնությունը սպորտով զբաղվելու հիանալի մոտիվացիա կլինի երիտասարդ սերնդի համար։
Ավելի վաղ հայտնի էր դարձել, որ 2018 թվականին Փհենչհանում տեղի ունեցած Օլիմպիական խաղերի արծաթե մեդալակիր Եվգենյա Մեդվեդևան լքում է իր մարզչին` Էթերի Տուտբերիձեին։ Ավելի ուշ գեղասահորդուհին հաստատել էր տեղեկությունը` հայտնելով, որ մարզվելու է կանադացի գեղասահորդ և մարզիչ Բրայան Օրսերի մոտ։
