ԵՐԵՎԱՆ, 1 սեպտեմբերի — Sputnik. Պրոֆեսիոնալ թենիսիստների ասոցիացիայի (ՊԹԱ) վարկանիշի առաջատար, իսպանացի Ռաֆայել Նադալը կարծում է, որ ռուսաստանաբնակ Կարեն Խաչանովին մեծ ապագա է սպասում։ Այս մասին հայտնում է ՌԻԱ Նովոստին։
Ուրբաթ Նադալը հաղթել է Խաչանովին ԱՄՆ-ի Բաց առաջնության երրորդ շրջանում՝ տապալելով նրան չորս սեթերի ընթացքում (5:7, 7:5, 7:6 (9:7), 7:6 (7:3))։ Միաժամանակ առաջին սեթի ընթացքում Խաչանովին հաջողվել է հաղթել աշխարհի ուժեղագույն թենիսիստին։ «Մարտը» գրեթե չորսուկես ժամ է տևել։
«Խաչանովը շարունակում է առաջ գնալ։ Նա երիտասարդ է, ամեն ինչ ունի, հիանալի խաղացող է։ Հավատում եմ, որ Խաչանովը դեռ շատ խաղերում կհաղթի։ Նրան մեծ ապագա է սպասում», — ընդգծել է թենիսիստը։
Աշխարհի առաջին ռակետը նշել է, որ Խաչանովի հետ խաղը դժվար էր, քանի որ ռուսաստանցի թենիսիստը ագրեսիվ էր խաղում։
«Շնորհավորում եմ Կարենին։ Նա ամբողջ խաղի ընթացքում հիանալի տրամադրվածություն ուներ, մինչև վերջ պայքարում էր, ագրեսիվ էր խաղում, հիանալի թենիս էր ցուցադրում։ Դա շատ լավ է մրցաշարի ու իր համար։ Համոզված եմ՝ այսպիսի տրամադրվածությամբ նա մեծ հաջողությունների կհասնի», — ասել է Նադալը։
Պրոֆեսիոնալ թենիսիստների ասոցիացիայի վարկածով ուժեղագույն թենիսիստը խոստովանել է, որ խաղի ընթացքում բարդ պահեր է ապրել։
«Ֆիզիկապես ու հոգեպես շատ ծախսատար խաղ ստացվեց», — հայտնել է Նադալը։
Նախկինում թենիսիստները չորս անգամ հանդիպել են, ու ամեն անգամ Նադալը հաղթել է հակառակորդին՝ ոչ մի սեթ չզիջելով։ Առաջին ռակետը Խաչանովին հաղթել է Պեկինում, Մոնտե Կառլոյում, Տորոնտոյում ու Ուիմբլդոնում։
