ԵՐԵՎԱՆ, 24 հոկտեմբերի — Sputnik. Հայաստանի բռնցքամարտի գործիչներն ու բռնցքամարտիկները բաժանվել են երկու ճամբարների ու մեղադրում են միմյանց ոչ կոմպետենտ լինելու մեջ: Բայց հիմնախնդիրը մեկն է` բռնցքամարտի ֆեդերացիայի նախագահի աթոռը, որին այս պահին նստում է Արթուր Գևորգյանը:
2018 թվականի հուլիսի 5-ին կայացած ՀԲՖ համաժողովում Արթուր Գևորգյանը հայտարարեց, որ մեկ ամսով դադարեցնում է ՀԲՖ նախագահի իր գործունությունը մինչև նոր ընտրություններ, ու եթե կլինի մեկը, ով կառաջադրի իր թեկնածությունը ՀԲՖ նախագահի պաշտոնում, ապա պատրաստ է իր նոր ծրագրերով մտնել մրցակցային դաշտ ու չի ունենա գործող նախագահի առավելությունը: 2018 թվականի օգոստոսին ՀԲՖ նախագահի ընտրություններում միակ թեկնածուն Արթուր Գևորգյանն էր, ու նա էլ ընտրվեց միաձայն:
Այս ամենից հետո հնչեցին քննադատական խոսքեր Արթուր Գևորգյանի, բռնցքամարտի Հայաստանի ազգային հավաքականի գլխավոր մարզիչ Դավիթ Թորոսյանի հասցեին: Մի խումբ հայտնի մարզիչներ դեմ են Արթուր Գևորգյանի պաշտոնավարությանը: Սակայն կողմերը կլոր սեղանի շուրջ այդպես էլ չնստեցին, ու մեղանդրանքները շարունակում են հնչել մինչև օրս:
Հիմա էլ Հայաստանի բռնցքամարտի առաջնությունը բոյկոտում են ոչ միայն մի խումբ հայտնի մարզիչներ, այլև նրանց են միացել նաև գործող բռնցքամարտիկներ: Բացի այդ, հիմնվել է Հայաստանի բռնցքամարտի ազգային ֆեդերացիա, ու ստացվում է, որ Հայաստանում գործում է բռնցքամարտի երկու ֆեդերացիա: Սակայն պարզ է, որ այս երկու ֆեդերացիաներից միայն մեկին է ճանաչում բռնցքամարտի համաշխարհային ֆեդերացիան(AIBA): Իսկ այդ կազմակերպության անդամ եղել ու կա ՀԲՖ-ն, որի նախագահն է Արթուր Գևորգյանը:
Կարճ ասած, պառակտումը մեր բռնցքամարտում ակնհայտ է: Գևորգյանը նշում է, որ դժգոհողների կողքին կանգնած է ՀԱՕԿ-ը, որի օգնությամբ էլ հիմնադրվել է նոր ֆեդերացիան: Ինչ-որ նոնսենս է ստացվում: Ունենք երկու ֆեդերացիա, հաստատ այդ ֆեդերացիաների ներքո կլինին բռնցքամարտիկներ, որոնք կմարզվեն, բայց արդեն պարզ է, որ այն բռնցքամարտիկները, որոնք բոյկոտել են ՀՀ առաջնությունը, կզրկվեն Հայաստանի հավաքականի կազմում հանդես գալու հնարավորությունից:
Ստացվում է` ֆեդերացիաները, մեկը մյուսին խանգարելով, ճգնաժամի մեջ են գցում հայկական բռնցքամարտը: Իսկ առջևում նախաօլիմպիական տարի է: 2019 թվականին օլիմպիական վարկանիշներ վաստակելու համար լուրջ ու տքնաջան աշխատանք է հարկավոր, իսկ բռնցքամարտի գործիչներն առայժմ տարված են անպատասխան հարցեր առաջ քաշելով:
