ԵՐԵՎԱՆ, 14 փետրվարի – Sputnik. Առաջին ծանր քաշային կարգում WBA «ժամանակավոր» չեմպիոն Արսեն Գուլամիրյանի (ռինգ է դուրս գալիս Ֆրանսիայի դրոշով) և WBA (Regular) չեմպիոն Բեյբութ Շումենովի (Ղազախստան) մենամարտի փրոմոութերական սակարկությունները կայացել են Պանամայում` WBA–ի կենտրոնակայանում։ Sports.kz–ը հայտնում է, որ արդյունքում սահմանվել են մարզիկների հոնորարները։
Նշվում է, որ սակարկության մեջ հաղթել է Շումենովի փրոմոութերը` Դոն Քինգը, որն իր հակառակորդի դրույքը գերազանցել է 200 հազար դոլարով` առաջարկելով 821 հազար դոլար մրցանակային ֆոնդ։
Կազմակերպիչները Արսեն Գուլամիրիյանի ու Բեյբութ Շումենովի մարտի երեք հնարավոր օր են դիտարկում։
Հայտնում են, որ մարտը կարող է տեղի ունենալ ապրիլի 15–ին Մոնտե Կառլոյում, ապրիլի 30–ին Աստանայում կամ մայիսի 13–ին Նյու Յորքում։ Մարտի օրն ու վայրը պետք է WBA–ին ներկայացնեն երկու շաբաթվա ընթացքում։
WBA–ի կանոնների համաձայն` հոնորարները բաշխվելու են 55/45 տոկոսային հարաբերակցությամբ Շումենովի օգտին։ Այսպիսով` Բեյբութը մարտի համար կստանա 451 550 ԱՄՆ դոլար, իսկ նրա մրցակիցը` 369 450 դոլար։
Հիշեցնենք` 2018 թվականի հոկտեմբերի 20–ին Ֆրանսիայում Գուլամիրյանը նոկաուտի է ենթարկել Մարկ Ֆլանագանին ու պաշտպանել ծանր քաշային կարգում WBA չեմպիոնի ժամանակավոր տիտղոսը։
Գուլամիրյանի համար սա չեմպիոնի գոտու առաջին պաշտպանությունն էր։
Նա հաղթանակը նվիրել էր Շառլ Ազնավուրին, որը կյանքից հեռացել էր նախորդ տարվա հոկտեմբերի 1–ին։
Գուլամիրյանը առաջին ծանր քաշում Բռնցքամարտի համաշխարհային ասոցիացիայի վարկածով չեմպիոն էր դարձել 2018 թվականի մարտի 24–ին։
Ինչ վերաբերում է Շումենովին, ապա նախորդ մարտը նա անցկացրել է Ղազախստանում նախորդ տարվա հուլիսի 7–ին։
