ԵՐԵՎԱՆ, 26 մարտի — Sputnik. Մարմնամարզության Հայաստանի տղամարդկանց թիմի Դոհայի աշխարհի գավաթի խաղարկությունում գերազանց է հանդես եկել։
Այս մասին այսօր կայացած ասուլիսում ասաց ազգային թիմի գլխավոր մարզիչ Հակոբ Սերոբյանը:
«Մենք 100 տոկոսանոց արդյունքի հասանք, քանի որ մեր 4 մասնակիցներն էլ դուրս եկան եզրափակիչ: Ոչ մի թիմ նման արդյունք չի գրանցել: Մեզ համար անսպասելի և հաճելի էր եզրափակիչում 3 մեդալ նվաճելը: Եթե նման ելույթներ ունենանք Եվրոպայի առաջնությունում, շատ լավ կլինի»,- լրագրողների հետ հանդիպման ժամանակ ասաց Սերոբյանը:
Մարզիչի գնահատմամբ` հրաշալի է հանդես եկել Արթուր Դավթյանը, ով վնասվածք ուներ, սակայն կարողացել է մեդալ նվաճել:
«Հավաքականը մեծ դժվարությունների է բախվում, քանի որ թիմը բժիշկ չունի, և մարզիկները վնասվածքների ժամանակ չգիտեն՝ ինչ անել: Մի քանի օրից մեկնում ենք Թբիլիսի ուսումնամարզական հավաքի, որին կմասնակցեն նաև երիտասարդ մարմնամարզիկները»,-եզրափակեց մասնագետը:
Հավաքականի մարզիչ Սոս Սարգսյանը ևս գոհ է մարզիկների գրանցած արդյունքից։ «Մերոնք լավ աշխատանք կատարեցին, մարզիկների ելույթը սպասվածից ավելին էր»,–ասաց նա:
Նշենք, որ Դոհայում կայացած աշխարհի գավաթի խաղարկության հերթական փուլին Հայաստանի հավաքականը մասնակցել է 4 մարզիկով: Արթուր Դավթյանը հենացատկերի վարժությունում գրավել է երրորդ, Արթուր Թովմասյանը օղակեների վարժությունում՝ երկրորդ, իսկ Վահագն Դավթյանը նույն օղակների վարժությունում՝ երրորդ տեղը: Հարություն Մերդինյանը նժույգաթափերի վարժությունում 5-րդն էր:
