ԵՐԵՎԱՆ, 23 ապրիլի — Sputnik, Արմենուհի Մխոյան. Պատիվ ունեմ ղեկավարելու այն մարզը, որը սպորտային շատ մեծ պոտենցիալ ունի։ Այս մասին այսօր ասաց Շիրակի մարզպետ Տիգրան Պետրոսյանը` ընդունելով տարբեր մարզաձևերով Աշխարհի և Եվրոպայի առաջնություններում այս տարի բարձր արդյունքներ գրանցած մազիկներին ու նրանց մարզիչներին: Մարզպետը հաճելիորեն զարմացավ և նշեց, որ ինչպես միշտ այս անգամ էլ հաջողության հասած մարզիկների թիվն այնքան մեծ է, որ աշխատասենյակում հազիվ են տեղավորվում:
«Երբ այս մարզով հետաքրքրվող ներդրողները հարցնում են մարզի ամենաուժեղ կողմերի մասին, ես միշտ ասում եմ՝ այս մարզի ամենաուժեղ կողմն այս հող ու ջրի վրա ապրող մարդիկ են, իսկ մարզիկներն այս մարզի ամենաերևացող կողմն են՝ ինչպես ֆիզիկապես, այնպես էլ հոգեպես: Սպորտը, որքան ֆիզիկական, այնքան էլ հոգեկան հաղթանակ է: Մենք այսօր պետք է սրանով ստիպենք բոլորին հավատալ մեր մարզին»,-նշեց Պետրոսյանը՝ մարզի զարգացման գործում կարևորելով նաև հաղթանակներ գրանացած մարզիկների դերը՝ նրանց մարզի դեսպաններ կոչելով:
Շնորհավորական խոսքեր, շամպայն ու տորթ, որը կտրելու պատիվն այս անգամ Եվրոպայի չեմպիոն, ծանրամարտիկ, Գյումրու ծանրամարտի մարզադպրոցի սան Հակոբ Մկրտչյանին էր տրվել: Սակայն մինչ մաղթանքներին ու շնորհավորանքներին անցնելը, մարզիչներն ու մարզիկները խոսեցին խնդիրներից: «Մեզ համար հաճելի է, որ միշտ գնահատված ենք քաղաքում, մարզում»,-նշեց ծանրամարտիկ Գոռ Մինասյանը` փաստելով, որ ունեն շատ խնդիրներ մարզադահլիճների վատ վիճակից մինչև հնացած մարզագույք: «Ծանրամարտի դահլիճի ծանրաձողերը Յուրի Վարդանյանի պարապած ծանրաձողերն են՝ 60-70-ականների թվականների»,-հավելեց Գոռը:
Բացի գույքի խնդիրներից, մարզիկներն առանձնացրին մարզական պալատի բացակայության, ինչպես նաև դիսպանսերի անհրաժեշտության հարցը:
2019 թվականի ապրիլի 23-ի դրությամբ աշխարհի և Եվրոպայի առաջնություններում ու գավաթի խաղարկություններում 9 մարզաձևերի ՀՀ հավաքականի թիմերի կազմում հանդես են եկել Շիրակի մարզի 30 ներկայացուցիչներ: Նրանցից 13-ը դարձել են մեդալակիրներ՝ ընդհանուր հաշվարկով նվաճելով 20 մեդալ, որից 4-ը ոսկե, 6-ը արծաթե և 10-ը բրոնզե:
