ԵՐԵՎԱՆ, 31 հուլիսի – Sputnik. Այս թիմը, որը բոլորին ստիպեց խոսել իր մասին, մեկնարկեց Հայաստանի բարձրագույն խմբի առաջնության 2019/2020 թվականների մրցաշրջանում և գրեթե մոտ էր բոլոր մրցանակները նվաճելուն: Նախ «Նոան» երկրի գավաթի հիշարժան եզրափակիչում գերլարված ու դրամատիկ պայքարում հետխաղյա 11–մետրանոց հարվածաշարով հաղթեց Երևանի «Արարատ-Արմենիային», իսկ մի քանի օր անց առաջնության վերջին ու վճռական խաղում պարտվեց նույն թիմին ՝ բավարարվելով արծաթե մեդալներով:
Օգոստոսին ակումբը նշելու է իր առաջին տարեդարձը, հետևաբար վերջին առաջնության մեկնարկից առաջ բոլորը հասկանում էին, որ անհնար կլինի անմիջապես հասնել բարձր նվաճումների: Բայց խնդիր կար յուրաքանչյուր խաղում ներդնել մեծ ջանքեր, որովհետև խաղացողներն ունեին լրջագույն հավակնություններ և պատրաստ էին ի ցույց դնել իրենց բոլոր հնարավորությունները: Սա դարձավ մրցաշարային աղյուսակում բարձր տեղ գրավելու և գավաթը նվաճելու գրավականը: Այդ մասին այսօր Sputnik Արմենիա մամուլի կենտրոնում կազմակերպված առցանց ասուլիսի ժամանակ խոսեցին «Նոա» ֆուտբոլային ակումբի գլխավոր մարզիչ Իգոր Պիկուշչակը և մարզական տնօրեն Հայկ Հովակիմյանը:
«Տղաները շատ աշխատեցին և արդյունավետ: Նրանք նկատելիորեն առաջընթաց ունեցան: Շուտով համոզվեցինք, որ կարող ենք լինել լավագույն քառյակում և վստահաբար հավակնել գավաթը նվաճելուն», - ասում է գլխավոր մարզիչ Իգոր Պիկուշչակը:
Ըստ նրա` թիմը լավ անցկացրեց ձմեռային մարզման հավաքները և վերջնականապես հղկեց խաղային ձեռագիրը, իսկ մրցաշրջանի միջնամասում ուժեղացավ ոչ միայն կազմի առումով, այլև մարտավարական ու ֆիզիկական պատրաստվածության տեսանկյունից: Մրցաշրջանի երկրորդ կեսը թիմը հիանալի անցկացրեց և գրանցեց յոթ անպարտելի խաղերից բաղկացած երեք սերիա։
Հայաստանի հերթական առաջնությունը կսկսվի օգոստոսի կեսից, իսկ Եվրոպայի լիգայում «Նոան» կմեկնարկի ամսվա վերջին: Առաջիկա օրերին ակումբը կհայտարարի նոր ուժեղ ֆուտբոլիստներ ձեռք բերելու մասին, որոնցից մեկն ընդգրկված է Հայաստանի հավաքականի ընդլայնված կազմում: Ավելի վաղ հայտարարվել էր, որ թիմին միացել է ազգային հավաքականի խաղացող, հայկական արմատներով կոլումբիացի Ժոաո Ժորդի Մոնրո Արարատը:
Նոր մրցաշրջանից խստացվում է լեգեոներների քանակի սահմանափակումը (2-ը` խաղադաշտում, 9-ը` հայտացուցակում), այնպես որ ակումբը որոշեց թիմի կազմում ներառել հայկական անձնագրով խաղացողների:
«Հեշտ հանդիպում չէր, բայց մենք պետք է հաղթեինք». Մխիթարյանը` «Ռոմայի» հաղթանակի մասին
«Ակումբի կառավարման գործում անտարբեր մարդիկ չկան: Մեզ մոտ հավաքել են նրանք, ովքեր էությամբ մաքսիմալիստներ են: Բժշկական անձնակազմը նույնպես կարևոր դեր է խաղացել առաջընթացում: Բարոյական և կամային որակների շնորհիվ բազմաթիվ հաղթանակներ են եղել»,- ասում է մարզական տնօրեն Հայկ Հովակիմյանը:
«Արարատ» ակումբը 2 նոր պաշտպան ունի
Ըստ նրա`կազմի համալրումից բացի, ակումբն ունի հեռանկարային ծրագրեր և ցանկանում է ստեղծել սեփական մանկապատանեկան ակադեմիան: Այդ նպատակով շուտով Հայաստան կժամանեն գերմանական հայտնի «Քյոլն» ակումբի մասնագետները, որոնց հետ հաստատվել են գործընկերային հարաբերություններ: Անդրադառնալով թիմի ապագա ծրագրերին` գլխավոր մարզիչը նշեց, որ նոր մրցաշրջանում «Նոան» կպայքարի երկրի չեմպիոնի տիտղոսի համար, կփորձի կրկին նվաճել երկրի գավաթը, իսկ Եվրոպայի լիգայում կձգտի ցատկել գլխից վեր ու հնարավորինս առաջ գնալ մրցաշարում:
