ԵՐԵՎԱՆ, 6 դեկտեմբերի – Sputnik. Հայաստանի ֆուտզալի հավաքականը Բուլղարիայի Վառնա քաղաքում այսօր, անցումային փուլի առաջին խաղում, 4։0 հաշվով առավելության հասավ Բուլղարիայի հավաքականի նկատմամբ։
Խմբային փուլում մեր հավաքականը Բելգիայի, Շոտլանդիայի և Չեռնոգորիայի թիմերի հետ պայքարում զբաղեցրեց երկրորդ տեղը և իրավունք վաստակեց մասնակցելու անցումային խաղերին։ Վիճակահանությունը մեր թիմին որպես մրցակից ընտրեց Բուլղարիայի ընտրանուն։
Կողմերի միջև երկու խաղերից մեկը պետք է կայանար Երևանում, բայց պատերազմի պատճառով որոշվեց, որ երկու խաղերն էլ թիմերը կանցկացնեն Բուլղարիայում։
Հայաստանի ֆուտզալի հավաքականը վերելքով անցկացրեց անցումային փուլի առաջին հանդիպումը Բուլղարիայի ընտրանու հետ։ Գրագետ գործողությունները պաշտպանությունում և սրընթաց ու անկանխատեսելի գրոհները տվեցին իրենց արդյունքը։ Մերոնք հաշվի մեջ առաջ անցան հանդիպման 11-րդ րոպեին, երբ տուգանայինը անվրեպ իրացրեց Համլետ Մանուկյան։ Մինչև ընդմիջում նույն Մանուկյանը և Դավիթ Ասլանյանը մեր ընտրանու առավելությունը հասցրին երեք գնդակի։ Իսկ խաղավերջում Վլադիմիր Սանոսյանը վերջակետ դրեց խաղին՝ 4։0 հաշվով հաղթանակ բերելով Հայաստանի հավաքականին։
Առջևում թիմերի միջև երկրորդ հանդիպումն է, որը տեղի կունենա դեկտեմբերի 9-ին։ Այս խաղում էլ հաջողության, կամ ձեռնտու արդյունքի հասնելու դեպքում ֆուտզալի Հայաստանի հավաքականն իրավունք կվաստակի մասնակցելու խմբային փուլին, որում արդեն միայն առաջին տեղը զբաղեցնելը կապահովի Եվրոպայի առաջնության ուղեգիր։ Իսկ այն տեղի կունենա Նիդեռլանդներում 2022 թվականին։
