ԵՐԵՎԱՆ, 4 մայիսի – Sputnik, Խաչիկ Չախոյան. Հյուսիսային Մակեդոնիայում ընթացող մինչև 23 տարեկան ըմբիշների Եվրոպայի առաջնությունում Ռազմիկ Պապիկյանն ու Հրայր Ալիխանյանը իրենց քաշային կարգերում հասել էին եզրափակիչ, բայց մեր երկու ըմբիշներն էլ վերջին մրցումների վերջին գոտեմարտում պարտվեցին` դառնալով արծաթե մեդալակիր։
Ռազմիկ Պապիկյանը (61կգ) իր ելույթները սկսեց քառորդ եզրափակիչից ու առաջին գոտեմարտում 9։6 հաշվով հաղթեց ուկրաինացի Արտյոմ Կրիվենկոյին, իսկ կիսաեզրափակիչում նվազագույն առավելությամբ՝ 3։2 հաշվով, հաղթանակ տոնեց թուրք Էմրահ Օրմանօղլուի նկատմամբ ու ոսկե մեդալի համար գոտեմարտեց է վրացի Թեյմուրազ Վանիշվիլիի հետ։ Ցավոք, Պապիկյանը չկարողացավ ցուցադրել իր ամբողջ ներուժը ու պարտվեց 1։6 հաշվով դառնալով Եվրոպայի փոխչեմպիոն։
74 կգ քաշային Հրայր Ալիխանյանը երեք գեղեցիկ ու անընդմեջ հաղթանակներից հետո իրավունք ստացավ վիճարկելու Եվրոպայի չեմպիոնի կոչումը։ 1/8 եզրափակիչում Ալխիանյանը 10։0 հաշվով առավելության հասավ Ավստրիացի Սիմոն Մարկլի նկատմամբ։ Քառորդ եզրափակիչ գոտեմարտի ընթացքում Հրայրը պարտվում էր թուրք Իսա Դեմիրին 2։4 հաշվով, բայց կամային որակների շնորհիվ մաքուր հաղթանակ տարավ ու դուրս եկավ կիսաեզրափակիչ։ Այստեղ էլ Ալխանյանը բացահայտ առավելությամբ՝ 12։2 հաշվով պարտության մատնեց հույն Գեորգիոս Կոգիոումցիդիսին և դուրս եկավ եզրափակիչ։ Եզրափակիչում Հրայրը 0։4 հաշվով զիջեց ռուսաստանցի Չերմեն Վալիևին։
Ինչպես արդեն հայտնել էինք, այս մրցաշարում մայիսի 18-ին 70 կգ քաշային Արման Անդրեասյանը և 79 կգ քաշային Արման Ավագյանը դարձան բրոնզե մեդալակիր։
Այսպիսով ազատ ոճայինները, մրցումներում մասնակցելով յոթ ըմբիշներով, վաստակեցին չորս մեդալ։ Վաղը Եվրոպայի մինչև 23 տարեկան ըմբիշների առաջնությունում գորգ դուրս կգան հունահռոմեական ոճի ըմբիշները։ Հայաստանի հավաքականը ներկայացված է լինելու բոլոր՝ տասը քաշային կարգերում։
