ԵՐԵՎԱՆ, 25 մայիսի – Sputnik. Հայաստանի ֆուտբոլի ֆեդերացիան խստորեն դատապարտում է Հայաստանի ազգային հավաքականի գլխավոր մարզիչ Խոակին Կապառոսի կողմից կազմի հրապարակումից հետո սկսված քաղաքական շահարկումները: Այս մասին գրում է ՀՖՖ մամուլի ծառայությունը։
Մայիսի 24-ին ՀՖՖ պաշտոնական կայքում հրապարակվեց Հայաստանի ազգային հավաքականի՝ առաջիկա հանդիպումների համար նախապատրաստվող ֆուտբոլիստների հայտացուցակը: Դրանցում բացակայում էր Հայաստանի ազգային հավաքականի ավագ, «Ռոմայի» կիսապաշտպան Հենրիխ Մխիթարյանի անունը։ Դրանից հետո հանրության որոշ շրջանակներում սկսվեցին կազմի ընտրության վերաբերյալ տարատեսակ քննարկումներ, որոնք, ՀՖՖ–ի տեսանկյունից, «ակնհայտորեն պարունակում են քաղաքական ենթատեքստ և կրում են պատվիրված բնույթ»:
«Նշենք, որ տևական ժամանակ է՝ Հայաստանի ֆուտբոլի ֆեդերացիան որդեգրել է Հայաստանի ազգային հավաքականի գլխավոր մարզչի որոշումներին, մասնավորապես, կազմի ընտրությանը չմիջամտելու քաղաքականություն: Հավաքականի կազմը որոշում է բացառապես գլխավոր մարզիչը՝ ելնելով առաջիկա հանդիպումների համար իր ընտրած մարտավարությունից կամ նպատակներից»,–ասվում է ՀՖՖ–ի տարածած հաղորդագրության մեջ:
Նշվում է, որ ազգային հավաքականի հերթական խաղից առաջ կրկին փորձ է արվում բացասաբար ազդել ազգային հավաքականում տիրող հիանալի մթնոլորտի վրա:
Հիշեցնենք` Հայաստանի ազգային հավաքականի գլխավոր մարզիչ Խոակին Կապառոսը հայտնել էր` հավաքականի հիմնական կազմի մի շարք ֆուտբոլիստներ այս անգամ բացակայում են ցուցակից. այս անգամ որոշել են հանգստի հնարավորություն տալ նրանց և գործի մեջ տեսնել մի քանի երիտասարդների:
Խոակին Կապառոսը հրապարակել էր Հայաստանի ազգային հավաքական հրավիրված ֆուտբոլիստների ցանկը. 23 ֆուտբոլիստ, որոնցից 5-ը՝ նորեկ:
Հայաստանի ազգային հավաքականի ավագ Հենրիխ Մխիթարյանն այս առիթով Facebook-ի իր էջում գրառում էր արել` նշելով, որ պաշտոնական պատճառներն իրեն համոզում։
Հավելենք, որ Հայաստանի ազգային հավաքականը հունիսին անցկացնելու է ընկերական 2 հանդիպում: Հունիսի 1-ին՝ ժամը 20:00-ին, (Երևանի ժամանակով) Վելիկա Գորիցայի քաղաքային մարզադաշտում կկայանա Խորվաթիա-Հայաստան, իսկ հունիսի 5-ին՝ ժամը 22։45-ին, Ստոկհոլմի «Ֆրենդս Արենա» մարզադաշտում՝ Շվեդիա-Հայաստան ընկերական հանդիպումը:
Կապառոսը պատմել է քաղցկեղի հաղթահարման, Հայաստան գալու և հավաքականի նպատակների մասին
