Անի Լիպարիտյան, Sputnik
Հորդանանցի զբոսաշրջիկ Մուհամմեդ Զիադ Աբդուլաթիֆը Հայաստանում մոտավորապես մեկ շաբաթ է անցկացրել, բայց հասցրել է տեսնել այն ամենը, ինչ նախատեսել էր: Նա, բնականաբար, այցելել է նաև Երևանի կոնյակի գործարան:
Լեռնագնաց Մուհամմեդին անակնկալի է բերել այն տարածքը, որտեղ գտնվում է հայտնի գործարանը:
«Անհնար է պատկերացնել իմ դեմքը, երբ բարձրանում էի գործարան տանող աստիճաններով ու հետո տեսա գործարանի հետևի պատը: Մագլցելու ցանկություն առաջացավ», — Sputnik Արմենիայի թղթակցի հետ զրույցում ժպտալով պատմեց հորդանանցի զբոսաշրջիկը:
Էքսկուրսիայի ավարտին օտարերկրացուն տարել են համտեսի: Նա 3-5 և 10 տարեկան կոնյակներն ըմպել է դառը շոկոլադով ու հիացել հայկական կոնյակի համով: Բայց ասում է, որ ավելի շատ հավանել է հայկական սպիտակ գինին:
Մուհամմեդը եղել է նաև Երևանի պատմության թանգարանում, Հայոց ցեղասպանության թանգարանում, Կասկադի ճարտարապետական համալիրում: «Զվարթնոց» օդանավակայանից էլ ոտքով է հասել հյուրանոց, որպեսզի ճանապարհին որքան հնարավոր է շատ բան տեսնի:
Զբոսաշրջիկն այցելել է նաև Գառնի ու Գեղարդ։
«Ես որոշեցի գալ Հայաստան, քանի որ այստեղ գալու համար փաստաթղթեր պատրաստելը դժվար չէ, և հետո ձեր երկիրն ունի հարուստ և հետաքրքիր պատմություն, ինչպես նաև շատ համեղ սնունդ` մատչելի գներով», — ասում է Մուհամմեդը:
Հորդանանցի հյուրին անչափ տպավորել է Արարատ լեռը, որով նա հիացել է Կասկադի բարձունքից:
Հայաստանից հեռանալուց հետո Մուհամմեդը սեփական կարծիքն է կազմել հայերի մասին։ Ասում է` հայերը շատ բարի են, գթասիրտ և շատ լավ են խոսում անգլերեն:
