ԵՐԵՎԱՆ, 19 դեկտեմբերի — Sputnik. Հայաստան այս տարի 21%-ով ավելի զբոսաշրջիկ է ժամանել, քան 2016 թվականին։ Նախորդ տարվա 1 մլն-ի փոխարեն զբոսաշրջության պետական կոմիտեում հույս ունեն տարին ավարտել 1.5 մլն զբոսաշրջիկով։ Այս մասին այսօր լրագրողների հետ հանդիպմանն ասաց կոմիտեի նախագահ Զարմինե Զեյթունցյանը։
«Բայց սա, իհարկե, բավարար չէ, որովհետև մեր երկիրը շատ ավելի մեծ պոտենցիալ ունի։ Այսօր Հայաստանը տարեկան մինչև 3 մլն զբոսաշրջիկ ընդունելու հնարավորություն ունի»,- ասաց Զեյթունցյանը։
Հայաստանում զբոսաշրջության աճը խթանող հիմնական երկրներն են Իրանը, Ռուսաստանը, ԱՄՆ-ն, Ուկրաինան։
Այս տարի տոկոսային արտահայտությամբ Հայաստան այցելություններն ավելացել են նաև Հնդկաստանից, Չինաստանից, Ղազախստանից, ԱՄԷ-ից։
«Միայն ներքին անձնագրերով այս տարի ՌԴ-ից Հայաստան է ժամանել 50 հազարից ավելի մարդ։ Հետևաբար, այս կարգի փոփոխությունը ևս նպաստել է զբոսաշրջության աճին»,- նշեց կոմիտեի նախագահը։
Կոմիտեի մասնագետների հաշվարկով Հայաստան ժամանող յուրաքանչյուր զբոսաշրջիկ մեր երկրում ծախսում է միջինը 7-8 հարյուր դոլար։ Դրա շնորհիվ զբոսաշրջության մուտքերը ՀՆԱ-ում կազմել են 1մլրդ դոլար։
Բայց սա դեռ ցանկալիի սահմանագիծը չէ։ Զբոսաշրջության կոմիտեն հաջորդ տարի նոր տեղեկատվական ու ճանաչողական ծրագրեր է նախատեսել, որոնց իրականացման համար ոլորտի հատկացումը պետբյուջեից կրկնակի ավելացել է` 200 000 դոլարից հասնելով 400 000-ի։
Ոլորտի ղեկավարը հույս հայտնեց, որ իրենց աշխատանքի շնորհիվ Հայաստանի տեղը շուտով հայտնի կդառնա բոլորին, ու Հայաստանն այլևս Ալբանիայի կամ Ռումինիայի հետ չեն շփոթի։
