ԵՐԵՎԱՆ, 7 մարտի — Sputnik. 2019 թվականի փետրվարի տվյալներով Հայաստանը (Ադրբեջանից հետո) երկրորդ տեղն է զբաղեցնում` քաղաքացիների Վրաստան այցելությունների թվով։
Ընդ որում, ինչպես հայտնում է Sputnik Գրուզիան, Հայաստանից այցելուների քանակը հարևան երկիր մեկ տարվա ընթացքում կրճատվել է 10,7%–ով։
Այս փաստը զարմացրել է շատերին, քանի որ հարևան Թբիլիսի, այցելում են նաև առանց առիթ, հենց այնպես, ուղղակի ընկերների հետ խինկալի համտեսելու և թբիլիսյան կոլորիտը վայելելու, կամ գնումներ անելու համար. մթերքներ, տեխնիկա կամ ավտոմեքենայի մասեր, որն այստեղ ավելի էժան է։
Սակայն տուրիզմի հայկական ֆեդերացիայի նախագահ Մեխակ Ապրեսյանը Վրաստանի նկատմամբ այսպես կոչված հետաքրքրության նվազման համար մի շարք բավական հիմնավոր պատճառներ է մատնանշում։
«Վրաստանը մեր հարևան երկիրն է, որը մեզնից յուրաքանչյուրս գոնե մեկ անգամ այցելել ենք. էլ չեմ խոսում այն մասին, որ շատերն այնտեղ են մեկնում՝ անցկացնելու հանգստյան օրերը», – Sputnik Արմենիայի թղթակցի հետ զրույցում ասաց Ապրեսյանը։
Նրա խոսքով` այցելուների քանակի կրճատումը պայմանավորված է նրանով, որ Հայաստանի բնակչությանը ծանոթ է Վրաստանը, այդ պատճառով էլ նրանք հանգստի համար նոր ուղղություններ են փնտրում։ Սա չի նշանակում, որ Վրաստանի նկատմամբ հետաքրքրությունը կորել է կամ հայերն ավելի քիչ են սիրում սևծովյան ափը։ Սակայն Վրաստանը չափչփած ՀՀ քաղաքացուն նոր էմոցիաներ են պետք, նոր բնապատկերներ հանգստի համար։ Վերջին շրջանում Վրաստանին այլընտրանքային ուղղություններ են դարձել Եգիպտոսի, Հունաստանի, ԱՄԷ–ի, Շրի Լանկայի զբոսավայրերը։
Ապրեսյանն ընդգծեց, որ պահանջարկն աճել է նաև նրա հաշվին, որ հանգստի համար նախատեսված այդ ուղղություններն ավելի մատչելի են դարձել, այսինքն` ոչ միայն թանկարժեք զբոսաշրջային փաթեթներ են առաջարկում, այլև բյուջետային։ Մարդկանց հաջողվում է տարեկան գոնե մեկ անգամ վայելել ոչ միայն սևծովյան ափերը։
Օրինակ, եթե Վրաստանում ամառային մեկշաբաթյա հանգիստը դեռևս 2015-2016 թվականի տվյալներով միջինում մեկ ընտանիքի հաշվարկով 1000 դոլար էր կազմում։ Ապա նույն գումարով և նույնիսկ ավելի քիչ, այսօր կարելի է հանգստանալ Եգիպտոսում։ Իջել են նաև Հունաստանի, Շրի Լանկայի և ԱՄԷ–ի զբոսաշրջային փաթեթների գները։ 1000 եվրոյով կարելի է հանգստանալ Կրետե կղզում, ինչպես նաև Շարժա մեկնել` այդ մասին նախապես հոգալու դեպքում։
Կարևոր դեր է խաղացել նաև այն, որ վերջին շրջանում, ավելացել է Երևանից տարբեր քաղաքներ մեկնող չարտերային չվերթերի քանակը։
Այսպիսով, այդ երկրները այսպես ասած հետին պլան են մղում Քոբուլեթի և Բաթումի լողափերը։ Սակայն Ապրեսյանն ընդգծեց, որ անկախ այցելուների քանակի նվազմանը, Վրաստանն ամեն դեպքում շարունակում է մնալ ՀՀ քաղաքացիների հանգստի համար նախընտրելի ուղղություններից մեկը։
