Հայ վլոգեր Գուին Դալերան (Guin Dalera) կոտրում է կարծրատիպերն ու Հայաստանը զբոսաշրջիկների համար բացահայտում արտասովոր կողմից։ Աղջիկը շեշտը դնում է ոչ թե հայտնի տեսարժան վայրերի և հինավուրց եկեղեցիների, այլ էքստրիմի և բացառիկ տեղանքների վրա, որտեղ կարելի է ամբողջությամբ կտրվել առօրյա հոգսերից, անջատել հեռախոսն ու իսկապես ձուլվել բնության հետ։
Վլոգերը կարծում է, որ Հայաստանում պարտադիր այցելության մի քանի վայրեր կան։
«Հայաստանում գրեթե ցանկացած լեռնագագաթից կարելի է տեսնել 7 լեռնաշղթաները։ Դրանք հաջորդում են մեկը մյուսին` շողշողալով ծիածանի գրեթե բոլոր գույներով։ Տպավորություն է ստեղծվում, որ այդ յոթ սարերի հետևում այն հեքիաթային աշխարհն է, որի մասին մեզ պատմել են մանուկ հասակում։ Հայկական լեռներում անկրկնելի է նաև ճոճվող լուսինը։ Այն նման է փրփրուն գինով բաժակի. հայտնվում է հանկարծակի և աստիճանաբար դեղնում։ Դա պետք է տեսնել», – վստահեցնում է մեր զրուցակիցը։
Սյունեցի դպրոցականը փորձում է իրենց գյուղը զբոսաշրջային կենտրոն դարձնել ու ստացվում է
Վլոգերը հաճախ խորհրդատվություն է տրամադրում երթուղիների վերաբերյալ`այդ հարցում անհատական մոտեցում ցուցաբերելով։ Երբ նրան հարցնում են` հանգստյան օրերին ուր ուղևորվել, նա փոքրիկ հարցախույզ է անում` նախասիրությունները պարզելու և յուրաքանչյուրին իրեն հարմար ուղղություն ուղարկելու համար։ Sputnik Արմենիայի թղթակցին նա հանգստի մի քանի տարբերակ է առաջարկել, որի շրջանակում կարելի է համատեղել էքստրիմն ու էսթետիկան։
Աղջիկը խորհուրդ է տալիս մեկնել ռաֆթինգի Դեբետով. ադրենալին և բազում դրական հույզեր է Գուինը մեզ երաշխավորում։
«Պետք է նաև Որոտանի կիրճ կանյոնինգի գնալ։ Մի քանի արգելք հաղթահարել, անցնել գետը, այնուհետև կիրճը և վայելել դեպի ջրվեժները բացվող տեսարանը։ Այն ինչ կտեսնեք, անհավանական գեղեցիկ է` տարբեր գույներ, զանազան քարեր և միներալներ, պարզապես հիասքանչ է», – ասում է նա։
Վլոգերը խորհուրդ է տալիս նաև վրաններով արշավի գնալ դեպի լեռնային լիճ և անպայման լողալ այնտեղ` առանց ցրտից վախենալու։ Նա վստահեցնում է` այնտեղից այնքան էներգիա կստանանք, որ ուրիշ տեղ դժվար թե դա զգանք։ Սակայն Գուին համոզված է`շատ կարևոր է, թե ում հետ եք արշավի գնում. խարույկի շուրջ պետք է «ճիշտ» մարդիկ հավաքվեն։
Մեկ այլ հետաքրքիր առաջարկ. քնապարկերով գիշերակաց «Զորաց քարեր» (Քարահունջ) հնագույն աստղադիտարանի տարածքում։ Ոչ մի տեղ նման աներևակայելի աստղաթափությամբ ձեզ զմայլվել չի հաջողվի։
«Շատ հզոր է։ Այնտեղ աստղերը կարծես գետնին են դիպչում։ Հիմա դա անել հնարավոր չէ, հույս ունեմ, որ Քարահունջը շուտով բաց կլինի նաև գիշերը, և բոլորը կկարողանան վայելել այդ հրաշք երևույթը», – ասաց Դալերան։
Եվ վերջապես, վլոգերը խորհուրդ է տալիս այցելել Արցախ։ Տեսնել ոչ միայն բոլորին հայտնի Գանձասարն ու Շուշին, այլև ամենագնացներով ուղևորվել դժվարամատչելի վայրեր` տեսնելու վայրի ձիերին, «Կուկուռուզնիկով» թռչել և վայելել շքեղ տեսարանները։ Կարելի է Մեծ Տաղեր գյուղ այցելել և փորձել խոզի խորոված. ուրիշ ոչ մի տեղ այն այդքան համով չեն պատրաստում։
«Երբ համտեսեք, կհասկանաք` ինչու եմ այդպես ասում», – հավելեց աղջիկը։
Երկրով ավելի քան 10 տարի ճանապարհորդելով` Դալերան երբեք չի հաշվել, թե քանի վայր է հասցրել այցելել։ Վերջերս նա տարվել է ալպինիզմով և մի քանի լեռնային բարձունք հաղթահարել։ Վերջին վերելքը եղել է Խուստուփը։ Այժմ երազում է նվաճել Արարատը, այս երազանքն արդեն անիրագործելի չի թվում։ Սկզբում նա կհաղթահարի Հայաստանի ամենաբարձր լեռները, փորձ ձեռք կբերի, այնուհետև նոր միայն կնվաճի երազանքի բարձունքը։
Համացանցում մեծ տարածում են գտնում տեսանյութերը, որոնք Դալերան տեղադրում է յուրաքանչյուր նոր բարձունք հաղթահարելուց հետո, ապա ուրախությունից պարում աշխույժ երաժշտության տակ։ Այդպես է Գուին Դալերան փոխանցում իր հույզերն ու լավ տրամադրությունը։
«Որպես կանոն զբոսաշրջիկները Հայաստան են այցելում մի շարք` 76, 89 կամ նույնիսկ 126 (այս մասին վկայում են Դալերայի ուսումնասիրությունները) երկներում լինելուց հետո, սակայն բոլորը նշում են, որ եթե մարդն ուզում է բացահայտել աշխարհը և հաղորդակից լինել հոգևորի հետ, ապա ճանապարհորդությունը պետք է սկսի հենց Հայաստանից», – ընդգծում է նա։
Վլոգերը նշում է, որ Հայաստանը մարդկանց, խոհանոցի և լեռների մասին չէ։ Այն ավելի հարուստ ու խորն է, և դա զգալու համար պետք է այցելել և լինել իր նշած բոլոր վայրերում։
