«Երբ մեր հովիվը որսորդական հրացանով անօդաչու թռչող սարք է խոցում, երբ մարդը նռնականետով 50 մետրի վրա ռազմական ուղղաթիռ է խոցում, 19 տարեկան տղան 5 հատ տանկ է խոցում ու ասում է` էլ չկար, որ խփեի, իհարկե, Աստված մեզ հետ էր միանշանակ և շարունակելու է մեզ հետ մնալ։ Մնում է, որ մենք էլ Աստծո հետ լինենք, որպեսզի ավելի անխոցելի լինենք»,- ասաց Պարգև սրբազանը։
Արցախի հոգևոր առաջնորդը մեզ հետ զրույցում ներկայացրեց նաև 90-ականների ու 2016-ի պատերազմների տարբերությունները` դրանք կոչելով «3 հրաշք»։
«Մենք ունեցանք մի փառահեղ սերունդ, որը մեր սպասելիքներն էլ գերազանցեց։ 272 կմ-ի վրա 18-19 տարեկան տղաներից ոչ մեկն իր տեղը չզիջեց, չսասանվեց ու չվախեցավ, աշխարհում այսպիսի երևույթ չի եղել»,- նշեց Սրբազանը` ներկայացնելով հրաշքներից առաջինը։
«Նրանք այնքան պրոֆեսիոնալ էին մարտը վարում, որ 4 շարքային լեյտենանտի կոչում ստացան։ Սա՝ երկրորդը։ Երրորդն էլ այն է, որ պատերազմի մեկնարկից 2-3 ժամ անց ամբողջ ազգն ինքնաբուխ կերպով միաբանվեց։ Սրանք հրաշքներ են»,- ասաց Պարգև Սրբազանը։
Արցախի թեմի առաջնորդի հետ հարցազրույցն ամբողջությամբ կարող եք դիտել տեսանյութում։
