Հունաստանի կենդանի խորհրդանիշներից մեկը Նախագահական գվարդիայի պահակախմբի` էվզոնների հերթափոխն է։ Այդ հունական ավանդույթն ավելի քան երկդարյա պատմություն ունի։
«Մենք այդ կերպ հարգում ենք մարտերում զոհված անհայտ զինվորների հիշատակը, ինչպես նաև ընդգծում այն, որ մենք այսօր անկախ ենք և ազատ»,- Sputnik Արմենիայի թղթակցի հետ զրույցում ասաց հույն զինծառայողը։
Նրա խոսքով, էվզոնների համազգեստը պատահական չի ընտրվել, հենց այդպես են հագնվել հույն ապստամբներն Օսմանյան կայսրությունից անկախանալու համար պայքարում։
Համազգեստի գույները նույնպես խորհրդանշում են երկրի պատմության էջերը։ Օրինակ, կարմիր գույնը խորհրդանշում է նախնիների թափած արյունը, սևը` մահացածների հիշատակը։
Երբ գալիս են էզվոնները, տպավորություն է ստեղծվում, որ գետինը դողում է ոտքերիդ տակ։ Սակայն այդ մշակված հզոր քայլքը խորհրդանշում է հույն զինվորականների ուժը և հզորությունը։ Չնայած նրան, որ էզվոնները լռակյաց են և անշարժ, այդուամենայնիվ, նրանց շուրջ մարդիկ են հավաքում, հիմնականում` զբոսաշրջիկներ։
