Հայկական տոլմայի տասնյակ բաղադրատոմսեր ներկայացվել են Թբիլիսում կայացած «Տոլմա 2017» փառատոնի ընթացքում։ Լավագույն տոլման ընտրել է պրոֆեսիոնալ ժյուրին, որի կազմում ընդգրկված էին Հայաստանի խոհարարական արվեստի լավագույն վարպետները։ Ժյուրին, ինչպես միշտ, գլխավորում էր «Հայ խոհարարական ավանդույթների զարգացման և պահպանման» ՀԿ նախագահ Սեդրակ Մամուլյանը։
«Խոհարարական այսպիսի միջոցառումներն օգնում են ժողովուրդների մերձեցմանը. մարդիկ նստում են սեղանի շուրջ, միաժամանակ ուտում են ու զրուցում։ Հնուց ի վեր ընթրիքի սեղանը մեզ մոտ կլոր է եղել։ Կարծում եմ` հենց կլոր սեղանի շուրջ էլ բոլոր հարցերը լուծվում են»,- ասել է Սեդրակ Մամուլյանը Sputnik Գրուզիային։
Նա հայտնել է նաև, որ 2018 թվականին հայկական խոհանոցի ժառանգությունը տարածելու համար ծրագրվում է տոլմայի փառատոն անցկացնել մի շարք քաղաքներում, որտեղ հայկական սփյուռք կա։ Նման փառատոներ անցկացնելու համաձայնություն կա Մոսկվայի, Կալինինգրադի և Տյումենի հետ։ Տոլմայի փառատոնն արդեն մի քանի անգամ անցկացվել է նաև Վաշինգտոնում։
Հայկական տոլմայի մրցույթ-փառատոնը Թբիլիսում անցկացվում է հինգերորդ անգամ անընդմեջ։ Ամեն տարի փառատոնի մասնակիցների թիվն ավելանում է, իսկ Հայաստանում տոլմայի փառատոնն արդեն վաղուց է ավանդույթ դարձել։
Տոլմայի փառատոնին կարող են մասնակցել բոլոր ցանկացողները։ Կարևոր պայմանն այն է, որ ժյուրիի դատին հանձնվի սեփական ձեռքերով պատրաստված տոլման։ Իմպրովիզները ողջունելի են։ Ժյուրին հաշվի է առնում ոչ միայն համային հատկությունները, այլև մատուցման ձևն ու արտաքին տեսքը։
