«Այս ընտրությունները նախատեսված են Սահմանադրությամբ։ Եվ բոլոր գործընթացները, որոնք ընթանում են օրենքի և ժողովրդավարական գործընթացների համաձայն, այնպես, ինչպես դա ընդունված է նորմալ քաղաքակիրթ հասարակություններում, բնականաբար, չեն կարող չազդել Լեռնային Ղարաբաղի վարկանիշի վրա»,- ասաց Բաբայանը։
Ըստ նրա` աշխարհում բոլորին հայտնի է, որ Արցախն արդեն կայացած ժողովրդավարական նորմալ պետություն է, իսկ այն հանգամանքը, որ Արցախը ճանաչված չէ, այսպես ասած, զուտ աշխարհաքաղաքական գործընթացների հետևանք է։
«Վաղ թե ուշ, բնականաբար, մենք կդառնանք ճանաչված պետություն և միջազգային հանրության լիիրավ անդամ։»,- ասել է Բաբայանը։
Նշենք, որ Արցախի նախագահի ընտրությունը կայացավ փակ գաղտնի քվեարկությամբ։ Նիստին 33 պատգամավորներից ներկա էին 32-ը, որոնցից 28-ը քվեարկեցին գործող նախագահ Բակո Սահակյանի, 4-ը` «Շարժում 88» խմբակցության ղեկավար Էդուարդ Աղաբեկյանի օգտին։ Նոր նախագահը կպաշտոնավարի մինչև 2020 թվականը։
2017 թվականի սահմանադրության համաձայն` Արցախն անցում է կատարել կառավարման նախագահական ձևի, և այսուհետև երկիրը կղեկավարի նախագահը, որին 5 տարի ժամկետով կընտրի ժողովուրդը։ Նույն մարդը կարող է պաշտոնավորել ոչ ավելի, քան երկու անգամ անընդմեջ։