Այս են վկայում ՀՀ Ջրային տնտեսության պետական կոմիտեի տրամադրած տվյալները։ «Ախուրյան ջրամբարում ջրի ծավալն այս պահին 5,8 մլն խմ է»,- Sputnik Արմենիային հայտնեց ՋՏՊԿ մամուլի քարտուղար Սոնա Մարտիրոսյանը։ Մեր զրուցակիցը նշեց նաև, որ սեպտեմբերի 15-ից մինչ օրս հայկական կողմը դադարեցրել է ջրառը ջրամբարից, մինչդեռ թուրքական կողմը շարունակում է այն իրականացնել։ Նշենք որ պայմանագրով կողմերի համար սահմանված է թողքի նույն ծավալը։
525 մլն մ³ ծավալով Ախուրյանի ջրամբարը կառուցվել է 1963 թվականին Խորհրդային Միության և Թուրքիայի միջև ձեռք բերված համաձայնության արդյունքում: Ախուրյան գետից և Ախուրյանի ջրամբարից Հայաստանն ու Թուրքիան այդ պայմանագրով օգտվում են 50/50 սկզբունքով։ Նշենք նաև, որ հայ-թուրքական սահմանն անցնում է հենց Ախուրյանի ջրամբարի միջով։ Ու թեև ջրամբարը գտնվում է փշալարերից այն կողմ, բայց Sputnik Արմենիայի նկարահանող խմբին հաջողվել է նկարահանումներ կատարել դրա տարածքում՝ արձանագրելով շուրջ 99%-ով ցամաքած Ախուրյանի ջրամբարի ներկա վիճակը։
