10:09 14 դեկտեմբերի 2017
Ուղիղ եթեր
Տեսանյութեր

Հայ վաճառականների գանձերի կղզին. ինչպես են փնտրում Կարիբյան ծովում անհետացած նավը

Ստանալ կարճ հղումը
246 0 0
© Sputnik. Karen Balayan, Hovhannes Hakobyan

«Սա Հայաստանն է» նախագծի հեղինակներ Կարեն Բալայանը և Հովհաննես Հակոբյանը հաղորդաշարի հերթական փուլում շարունակում են պատմել XVII-րդ դարավերջին ծովահենների հափշտակած «Քեդախյան վաճառական» առևտրային նավը որոնող վաճառականների ճակատագրի մասին։

Միջնադարյան գծագրերի հիման վրա ձեռքով պատրաստած «Կիլիկիա» նավով հայ ծովագնացները 2007 թ. ձմռանը հասան Հաիթիի ափին: Այստեղ՝ Կարիբյան ծովում, Կատալինա կղզում տեղի բնակիչները հայտնաբերել էին «Քեդեխյան վաճառական»
անունով նավի բեկորները: Նավը պատկանում էր Նոր Ջուղայի հայ վաճառականներ Հովհաննեսին և Հակոբին: Այդ նավով նրանք Հնդկական օվկիանոսով Կալկաթա-Սուրաթ երթուղով ապրանք էին տեղափոխում:

Հերթական արշավի ժամանակ նավի վրա հարձակում էր գործել կապիտան Քիդը, որն այդ ջրերում աշխատում էր ի շահ բրիտանական թագավորության: Հայ վաճառականները թագավորական պահպանագիր ունեին, սակայն նրանց չփրկեց այն: Կապիտան Քիդը և նրա թիմը չկարողացան դիմադրել գայթակղությանը և վերցրին բեռով նավը: Ավելին, նրանք խորտակեցին իրենց հին նավը և հեռացան Հնդկական օվկիանոսից Կարիբյան ծով «Քեդեխյան վաճառականով»:

Նավի տերերն ու նավաստիներն ափ իջեցվեցին և առաջին իսկ հնարավորության պարագայում Լոնդոն բողոք ուղարկեցին: Կապիտան Քիդին ծովահեն հայտարարեցին: Հասկանալով, որ նրան մահացու վտանգ է սպառնում, նա թաքցնում է գտածը անմարդաբնակ կղզիներից մեկում: Քիդի ձերբակալությունից և մահապատժից հետո նրա թիմը վաճառեց ամբողջ ունեցվածքը Հաիթիի նավահանգիստներից մեկում և այրեց նավը, որի բեկորները քամին շպրտեց դեպի Կատալինա կղզի, որտեղ այն վերջնականապես խորտակվեց:

Հայ ծովագնացներն այդ տեղը գտան և իջան ջրի հատակը: Այնտեղ պահպանվել էին միայն կարալներով պատված նավի թնդանոթները: Քիդի դատի ժամանակ Լոնդոնում պարզվեց, որ նավը և բեռը պատկանում էին Բրիտանիայի միապետի հետ դաշնակից հայերին: Դարեր շարունակ գանձեր որոնողները փորձում են գտնել Քիդի թաքցրածը, բայց առայժմ՝ ապարդյուն: Նույնիսկ անհայտ մի կղզու քարտեզ է պահպանվել: Հայ ծովագնացները հույս ունեն, որ եթե գանձերը գտնեն, ապա Լոնդոնյան դատարանի որոշման հիման վրա Հայաստանը, որպես իր հայրենակիցների շահերի իրավահաջորդ, կարող է դառնալ նրա սեփականության տերը:

Այլ տեսանյութեր

Գլխավոր թեմաներ