ՀՀ տնտեսական մրցակցության պաշտպանության հանձնաժողովի նախագահ Արտակ Շաբոյանը, որը նաև նախագահում է ԵԱՏՄ մրցակցային մարմինների խորհուրդը, վստահեցնում է` «Եվրասիական շաբաթ» համաժողովը շատ կարևոր նշանակություն ունի, քանի որ տնտեսվարողներին հուզող հարցերը գործընկերների հետ քննարկելու հնարավորություն է ընձեռել։
«Հայկական ընկերությունները, որոնք խնդիրներ ունեն Եվրասիական տնտեսության տարածքում, այսօր այդ խնդիրների մասին խոսելու և գործընկերների հետ քննարկել հնարավորություն ունեն։ Ամենակարևորը համարում եմ այն, որ այս հանդիպմանը հրավիրել ենք նաև Ռուսաստանի «Ակորտ» ցանցերի ներկայացուցիչներին և հանդիպում ենք կազմակերպել հայկական արտահանող ընկերությունների համար»,- ասաց Շաբոյանը։
Նրա խոսքով` այդ հանդիպումը նպատակ ունի պարզելու` արդյոք հայկական ընկերությունները խնդիրներ ունեն Ռուսաստանի կամ ԵԱՏՄ անդամ երկրների տարածքում մանրածախ առևտրային ցանցերի ոլորտներում կան, թե ոչ։
«Որովհետև բազմիցս մեզ բողոքել են, որ չեն կարողանում աշխատել խոշոր սուպերմարկետների հետ, որոնք, որպես կանոն, նախընտրում են աշխատել տեղական դիստրիբյուտորական ընկերությունների հետ։ Մենք արդեն մի քանի հանդիպումներ ենք կազմակերպել, և հայկական արտահանող ընկերություններից շատերն արդեն կարողանում են աշխատել ռուսական խոշոր սուպերմակետների հետ։ Այսօր մենք հանդիպում ենք կազմակերպել` պարզելու համար հայկական արտահանող ընկերությունները մուտքի խոչընդոտներ ունեն, թե ոչ, ռուսական խոշոր սուպերմարկետները պայմանները սահմանափակում են, թե ոչ, արդյո՞ք հակական ընկերությունները կարողանում են հեշտությամբ մուտք գործել այլ շուկաներ»,- ասաց Շաբոյանը։
Հիշեցնենք, որ հոկտեմբերի 22-24-ը Երևանում տեղի կունենա «Եվրասիական շաբաթ» Եվրասիական տնտեսական միության ամենամյա գործնական միջոցառումը։ Համաժողովը մի հարթակում կմիավորի Եվրասիական տնտեսական միության (ԵԱՏՄ) անդամ-պետությունների և Միության գործընկեր-երկրների կառավարությունների ոլորտային ղեկավարներին, պետական կորպորացիաների և առաջատար բիզնեսի ղեկավարներին:
«Եվրասիական շաբաթ» համաժողովի ընթացքում կանցկացվեն ինտերակտիվ հարցումներ, շնորհանդեսներ, գործնական բանակցություններ, կրթական նստաշրջաններ և գործարարների համար բիզնես-դասընթացներ: Համաժողովի կարևոր իրադարձությունը կլինի ԵԱՏՄ-ի արտահանման և կոոպերացիոն ներուժի ցուցահանդեսը, որը կանցկացվի համաժողովի հարթակում վերջինիս անցկացման ողջ ժամանակահատվածում: Ցուցահանդեսին կմասնակցեն ավելի քան 120 ընկերություն հետևյալ ոլորտներից՝ գյուղատնտեսություն, թեթև արդյունաբերություն, ճշգրիտ ճարտարագիտություն և ՏՏ-տեխնոլոգիաներ, նորարարական շինանյութեր, ոսկերչական արդյունաբերություն, դեղագործություն:
