Գաբրիելյանը համամիտ չէ այն մարդկանց հետ, ովքեր կարծում են, որ շքանշաններն ու այլ պարգևները կարևոր չեն: Չկա մարդ, որ չի ուրախանում, երբ իրեն պարգևատրում են:
«Ամեն շքանշան, մեդալ, շնորհակալագիր ոգևորում է մարդուն ավելի լավ աշխատելու համար: Իմ բոլոր պարգևները միայն իմը չեն, նաև այն բոլոր մարդկանցն են, ում հետ ես աշխատել եմ երկար տարիներ: Արդեն 63 տարի ես սպորտում եմ: Մեծ հաջողություններ եմ ունեցել որպես մրցավար: Ես եղել եմ Սիդնեյի օլիմպիական խաղերի մրցավար և ճանաչվել եմ աշխարհում 3 լավագույններից մեկը: Մրցավար եմ եղել աշխարհի 8 առաջնությունների եզրափակիչներում, Եվրոպայի առաջնությունների ժամանակ»,- ասում է Գաբրիելյանը:
Դերենիկ Գաբրիելյանը նշում է, որ 87 երկրում է եղել և յուրաքանչյուրում փորձել է ճիշտ ներկայացնել իր ազգի, իր երկրի պատմությունը: «Սպորտի համար մեկնելով՝ մենք չենք մտածում միայն արդյունքների մասին, մենք մտածում ենք՝ ինչպես ճիշտ ներկայացնել մեր երկիրը: Դա առաջնայինն ու ամենակարևորն է: 2010, 2012, 2015 թվականներին ես եղել եմ տարբեր մարզաձևերի և խաղերի պատվիրակության ղեկավար Ադրբեջանում, Բաքվում: Եվ ամեն անգամ մեր պատվիրակությունը փորձել է ճիշտ և հային վայել պահել իրեն, բարձր պահել իր ազգայինը»,- ասում է նա:
Ըստ փոխնախագահի՝ մրցավարներն ամենաթիրախայինն են բոլոր առաջնություններում, բայց երբ 2002 թվականին ինքը 30 պետության ձայն է ստացել Եվրոպայի կոնֆեդերացիայի ընտրության ժամանակ և ընտրվել գործկոմի անդամ, միայն այդ ժամանակ է զգացել, որ ճիշտ ճանապարհ է անցել:
«Բուդապեշտում աշխարհի առաջնության ժամանակ ես եզրափակչի մրցավար էի, ռինգում էին Ֆրանսիան և Ռուսաստանը ներկայացնող բռնցքամարտիկներ: Ֆրանսիացի երիտասարդն ուժեղ էր, բայց արդյունքում զգացի, որ ռուս ներկայացուցիչն ավելի լավ արդյունքներ ցույց տվեց և հաղթանակը շնորհվեց նրան: Սովորաբար, երբ ավարտվում է մարտը, հանում են ձեռնոցները, և բարձրացնում են հաղթողի ձեռքը, ապա բռնցքամարտիկները մոտենում և շնորհակալություն են հայտնում մրցավարին: Սկզբում մոտեցավ ֆրանսիացին, ապա՝ ռուսը և անսպասելի բոլորի համար ինձ համբուրեց ռինգում, այդպիսի բան չի կարելի: Սակայն միջազգային ֆեդերացիայի նախագահը հասկացավ, որ ռուսն ուղղակի ոգևորվել էր հաղթանակից: Հետագայում՝ մինչև այսօր, առաջիններից մեկն, ով շնորհավորում է իմ ծննդյան օրը դա այդ ռուս բռնցքամարտիկն է՝ Ալեքսանդր Լեբզյակը», - նշում է Օլիմպիական կոմիտեի փոխնախագահ Դերենիկ Գաբրիելյանը:
Մեկ ամսից Մինսկում կանցկացվեն եվրոպական խաղերը, Հայաստանից բազմաթիվ մարզիկներ են մասնակցում, և ըստ Գաբրիելյանի՝ սպասելիքներ մեծ են, քանի որ բավականին հզոր թիմ է մտնելու Մինսկ:
