Երգչուհի Սրբուկը շուտով հանդիսատեսին կներկայանա ստեղծագործական նորություններով: Ներկայումս աշխատում է նոր բենդի հետ: Այս մասին նա ասաց Sputnik Արմենիայի հետ զրույցում։
«Իմ նախկին բենդը ՝Allusion-ը, իմ կյանքում մեծ տեղ է գրավել, քանի որ ես նրան վերաբերվել եմ սեփական երեխայի նման: Ցավոք, եկավ մի պահ, որ հասկացանք, պետք է բաժանվենք: Այսօր ես նոր բենդ ունեմ, որի հետ մեծ հաճույքով եմ աշխատում և այնտեղ ընդգրկված են շատ լավ երաժիշտներ »,- ասաց երգչուհին։
Երգչուհին շտապում է ուրախացնել երկրպագուներին`առաջիկայում համերգներով հանդես կգա նաև ՀՀ մարզերում:
Զրույցի ընթացքում երգչուհին անկեղծացավ` «Եվրատեսիլում» ինքն ավելի շատ փորձ է ձեռք բերել։ Նրա խոսքով` հետաքրքիր էր հետևել, թե միջազգային երաժշտական շուկայում ինչն է արդի, ինչ պետք է անել` ավելի մեծ հաջողություններ գրանցելու համար։
Կիսամերկ կուրծք և կարմիր շրթներկ. ի՞նչ տեսքով է ներկայացել Սրբուկը «Եվրատեսիլի» բացմանը
««Եվրատեսիլն» ավարտվեց ամենաանսպասելի հանգուցալուծումներով, սակայն վստահ կարող եմ ասել, որ այն ինձ ավելի շատ բան է տվել, քան վերցրել»,- նշեց Սրբուկը։
Երգչուհին անդրադարձավ նաև իր ոճին և քննարկվող լուքերին: Ասաց`ժպիտով է վերաբերվում իր ոճի շուրջ ծավալվող քննարկումներին։
«Սիրում եմ ուշադրության կենտրոնում լինել: Ուշի-ուշով հետևել եմ Եվրատեսիլի շրջանում իմ սպիտակ կոստիումի քննարկումներին. մեկնաբանությունների մեծ մասը հումորային էին»,- պատմեց երգչուհին:
Սրբուկին հայ հանդիսատեսը ճանաչեց 8 տարի առաջ` X Factor նախագծի միջոցով։ Դեռ այն ժամանակ «Վիտամինի» Գարիկի թիմում ընդգրկված 17–ամյա աղջնակն աչքի էր ընկնում հզոր վոկալով և արտիստիկ կեցվածքով: Նրան հաղթանակից բաժանեց ընդամենը մեկ քայլ:
25–ամյա երգչուհին այսօր արդեն ամուր կանգնած է իր ոտքերին. վերջերս նա մասնակցեց «Եվրատեսիլ» մրցույթին ու չնայած չհաղթեց, բայց չկոտրվեց:
Նշենք, որ Սրբուկը վերջերս իր հանդիսատեսին ներկայացրեց «Անհայտ բաժանորդ» ֆիլմի սաունդթրեքի տեսահոլովակը, իսկ հաշված օրեր անց կայացավ նրա համերգային ծրագրի շնորհանդեսը, որի վրա ամիսներ շարունակ աշխատել են ամբողջ թիմով։
