Հայաստանում խոշոր բիզնեսի բարգավաճումը տեղի է ունենում մանր ու միջին բիզնեսի կրճատման հաշվին: Ավելին՝ փոքր բիզնեսի մշակույթը մեզանում գնալով պարզապես վերանում է: Sputnik Արմենիայի հետ զրույցում այս մասին ասաց «Ամբերդ» հետազոտական կենտրոնի փորձագետ, տնտեսագիտության թեկնածու Հայկ Բեջանյանը։
«Բիզնես համակարգում այսպես ասած օդի թույլատրելի չափաբաժինը, բնականաբար, կարգավորում է պետությունը: Հույսը դնելով միայն խոշոր բիզնեսի վրա՝ պետությունը երկար ճանապարհ չի անցնի»,-նշում է Հայկ Բեջանյանը:
Տնտեսագետը կարծում է, որ պետությունն իրականացնելով խիստ վարչարարություն՝ խոշոր ընկերություններից հավաքագրում է գումարները, սակայն միաժամանակ զսպում է պետական ներդրումները: Այս հակադրությունը երկկողմանի տուգանում է տնտեսական աճը՝ մի կողմից խանգարելով ներդրողին, մյուս կողմից չմասնակցելով զարգացման գործընթացին՝ որպես պետություն: Այս խնդրից խուսափելու համար չափազանց կարևոր է պետության վերաբաշխիչ ֆունկցիան:
Անդրադառնալով նախկինում եղած տնտեսական միտումներին՝ Հայկ Բեջանյանը նշում է, որ անցյալը պետք է հետաքրքրի միայն ավելի լավ ապագա կառուցելու համար, իսկ այդ լավ ապագայի համար պետք է պրոֆեսիոնալ աշխատանք իրականացնել, հստակ գնահատել և հասկանալ տնտեսության զարգացումները և դրա հիման վրա մշակել այնպիսի քաղաքականություն, որն անկման վեկտորը կշրջի դեպի զարգացում:
Խոշոր հարկատուները 64 միլիարդով ավել գումար են բյուջե վճարել. Փաշինյանը գրառում է արել
Հիշեցնենք` վարչապետ Նիկոլ Փաշինյանը նշել էր, որ այս տարվա ինն ամիսներին հազար խոշոր հարկ վճարող ընկերությունները նախորդ տարվա նույն ժամանակահատվածի համեմատ պետբյուջե վճարել են 13.5 տոկոսով ավել գումար։
