«Արդար Ռուսաստան» կուսակցությունը ներկայացնող Պետդումայի պատգամավոր Օլեգ Նիլովը ՀՀ ԱԺ և ՌԴ Դաշնային ժողովի համագործակցության հարցերով միջխորհրդարանական հանձնաժողովի նիստի ընթացքում կատարեց կոզակների «Սև ագռավ» («Черный ворон») երգը։
Ռուսաստանի հայերին պետք է հնարավորություն տալ ուսումնասիրելու մայրենի լեզուն. Սանդիկով
Հանդիպումը տեղի ունեցավ Գյումրիում, որը Թուրքիայի հետ սահմանին է։ Այստեղ է տեղակայված նաև 102-րդ ռուսական ռազմակայանը և սահմանապահ ջոկատը։ Պատգամավորները հավաքվել էին «Սև բերդում»։ Այն հիմնադրել են կոզակները Նիկոլայ I կայսեր կառավարման օրոք, երբ Արևելյան Հայաստանն ազատվեց պարսից լծից։ Հայաստանում կոզակների ձեռամբ կանգնեցված պատմական շինության պատերը ոգեշնչեցին Նիլովին` երգ կատարել անմիջապես հանձնաժողովի նիստի ժամանակ։
Պատգամավորն ասաց, որ բերդը խորհրդանշում է հայ–ռուսական հարաբերությունների և ավանդական արժեքների ոգու համախմբվածությունը։ Նա հիշեց, թե ինչպես է 5 տարի առաջ կատարել նույն երգը Պետդումայի ամբիոնից։ Նրա խոսքով` դա անկեղծ դեմարշ էր ի պատասխան արևմտյան առաջնորդների հայտարարությանն այն մասին, որ նրանք «կավիրեն Ռուսաստանի տնտեսությունը», և արձագանք այն նորությանը, որ Եվրատեսիլին «մորուքավոր կին» է հաղթել (Կոնչիտա Վյուրսթը,–խմբ.)։ Այն ժամանակ նա մրցույթի ռուսական տարբերակի գաղափարն էր առաջարկել` «Բարետեսիլ» («Добровидение»)։ Միջոցառումն առաջին անգամ կանցկացվի հաջորդ աշնանը Սանկտ Պետերբուրգում։
ՀՀ ԱԺ ազգությամբ ռուս պատգամավոր Ալեքսեյ Սանդիկովը խոստացավ, որ անպայման ներկա կգտնվի «Բարետեսիլին», ընդ որում, Սանկտ Պետերբուրգ կժամանի իր հաշվին։
